TURA: West Garo Hills a·jani New Bhaitbari, Bowabari I, Bowabari II aro Morasuti-I songrangna Fair Price Shop (FPS) chalaina licence on·aniko New Bhaitbari jolo songdongenggipa mitam manderang jegalatenba, ia licence-ko den·galpilchina dabiangaha.
Iani bidingo Dadenggre-ni Sub-Divisional Officer (Supply)-na badi ka·e sedoatengon, New Bhaitbari-na Public Distribution System (PDS)-ni ning·o FPS-ko chalaina NABA-14 Heyana SHG-na licence-ko on·aniara niam gita ong·ja maina ia SHG-ni headquarter-de New Bhaitbari-o ong·ja indiba Kandargaon songosa ong·a ine New Bhaitbari-o songdongenggipa manderang parakataha.
“New Bhaitbari-o songdongenggipa manderangsa 90 percent-ni gita skia man·giparang ong·e, ia songsa mingsingbatgipa ong·a indiba sorkari official-rang, FPS-ko chalaina New Bhaitbari songni dolrangna on·gija gipin songni dolnasa on·skaaha,” ine New Bhaitbari songni mitam manderang, Dadenggre-ni SDO (Supply)-na sedoatgipa chittio parakataha.
Ia SHG-na FPS-ko chalaina licence-ko on·anio niamrangko pe·aha ine matnangatskaengon, ia SHG-na on·gipa licence-ko den·galpilenba, New Bhaitbari songni nokma ba gaonburarang gita cha·ani bosturangko sualskachina New Bhaitbari songni mitam manderang dabiangaha
 |