TURA: Tura-ko Winter Capital songchina gita Garo Hills-ni dingtang dingtang dolrang dabitokengon, iani bidingo A·chik Holistic Awakening Movement (AHAM) dol, a·dokni Chief Minister Conrad K Sangma-na sedoatenba, gisik ra·atpiltaianiko on·angaha.
AHAM-ni president George Prince Ch Momin-ni parakatani gitade, Meghalaya a·dokko man·na gita krengchengmiting somoion a·dokni dilgiparang, Khasi Hills-osan ong·aigija Garo Hills-koba man·chape Meghalaya a·dok gimikon apsan namroro silroroaniko niksamsoani gnangsa krengdilahani gimin Garo Hills-oba pilakni gitan namroro silroroaniko nikpana gita Tura-ko Second ba Winter Capital songna nangchongmotenga.
Tura-ko Winter Capital songna nangengani gimin janapatengon, ru·uta bilsirangonin Garo Hills-ni manderang, Tura-ko Winter Capital songchina nangnikenganiko paraktokaha aro ia dabianiko chu·sokatgenchimode, a·doko dingtang dingtang jatrang, mongsongbate Khasi, Garo aro Jaintia jatrangni ku·cholsan ong·aniko mesokani ong·gen ine Momin parakataha.
“Da·alo Shillong-osan sorkariko chalaiengani gimin Khasi aro Jaintia Hills a·jarango namroro silroroani kamrang apsan ong·jaenga aro Garo Hills-ode pilakni gitan ja·manchakkuenganiko nikna man·enga. Tura-ko Winter Capital songgenchimode Garo Hills-oba sorkarini kamrangko ka·e, pilakni gitan namroro silroroaniko nikpana man·gen,” ine AHAM-ni president parakataha.
Garo Hills-ni manderang, sorkarini mongsonggipa kamrangna Shillong-onasa re·na nangengani a·sel re·a doani aro donga cha·anirango bang·en koros ong·na nange neng·nikanirangko chagrongna nangtokenga indiba Tura-ko Winter Capital songgenchimode, ian Shillong-ni bal bojako komiatasan ong·aigija Garo Hills-o songdongenggipa manderangni neng·nikanirangko chel·atna dakchakani ong·gen ineba AHAM parakataha.
Shillong-ni Main Secretariat-na gong kror 1200 tangkarangko chame on·manahani gimin Tura-ni Additional Secretariat-ko namdapatna gita gong kror 600 tangkarangko chamdape on·china gitaba AHAM dabiangaha.
Maharashtra, Jammu & Kashmir aro gipin a·dokrango jekai second capital-rangko songe sorkariko chalaienga apsan daken Meghalaya a·dokoba Tura-ko second ba winter capital songchina AHAM dabiangaha.
Batanggimin bilsirango baditaba chang, Tura-ko Winter Capital songchina dabie AHAM, a·dok sorkarina sedoataha ine janapatskaengon, Garo Hills-o songdongenggipa manderangni ru·uta bilsirangna ka·donge nisengenganiko chu·sokatna gita Tura-ko Winter Capital songe on·china AHAM, a·dokni Chief Minister-na gisik ra·atpiltaianiko on·angaha.