SHILLONG: Assam aro Meghalaya simani bidingo soi ka·grikgipa Memorandum of Understanding (MoU)-ko jegale Supreme Court (SC)-ona re·angenggipa pilak manderangnan dakchakanirangko on·enga ine Meghalaya Pradesh Congress Committee (MPCC)-ni president aro Shillong-ni Lok Sabha MP Vincent H Pala parakataha.
“Iani bidingo bang·a manderangan angko grongna gita re·batokenga. Uamang Supreme Court-ona re·na nangniktokengani gimin anga uamangna dakchakanirangko on·enga maina simani bidingo sorkarini daka kamara namen namjaha,” ine Pala aganaha.
A·dok damgnini soi ka·grikanichi sima arirango songdongenggipa manderangna neng·nikanirangko on·engani gimin a·dok sorkariko sing·doatengon, Sixth Schedule area-ode a·arangara manderangnisa ong·achim indiba a·dok damgnini soi ka·grikanichi ia a·arang pilakan Assam-o napangtokgnok ine MPCC-ni president parakataha.
Meghalaya a·dokni wa·reng chonroroangengaha ine an·tangni suk ong·gijaniko parakatengon, “Uamang itihasko ma·sie ra·chengna nanga. Uamang manderangni agananirangko knachengna aro songrango nanganirangko nichengna nangachim indiba uamang iani bidingo jinmanasa u·iataiaha. Uamangni simaona re·angon, uamangko Assam-sa sason ka·aiaha aro ian chu·gimik pale cha·ani gitasa ong·aiaha,” ine Pala parakataha.
Bilo ong·enggipa manderang Assam baksa melie dongtokenga aro ia songgigrikani a·sel Meghalaya a·dokni mongsonggipa gam-jinrangko pangna jolnan gimaatgnok ineba ua aganaha.
Congress bilona re·bapilgenchimode a·dok damgnini soi ka·grikgipa MoU-ni gimin chanchipiltaigen ineba MPCC-ni president parakataha.
