SHILLONG: Meghalaya a·doko chadamberangna kam ka·e cha·ani cholrangko on·jaenga ine sorkarini kosako jegale jinma re·jomaniko ong·atanio so·sojengjeng ong·atani gimin East Khasi Hills a·jani Deputy Commissioner, ia a·selni bidingo talataniko on·china show cause notice-ko on·aha ina parakatahaoba da·o dipet uamang district administration-ni show cause notice-ko man·soa dongkuja ine Federation of Khasi Jaintia & Garo People (FKJGP) dolni dilgiparang a·kangatskaaha.
“Da·o dipet chinga show cause notice-ko man·soa dongkuja indiba iani bidingo chinga songbadrangonikosan niksona man·engkua. Show cause notice-ko man·soahaon chinga asonge chanchirimenba, mai ja·kuko de·ode namgen, uani gimin tik ka·anggen,” ine Sonibar salo, FKJGP-ni vice president Kitboklang Nongphlang parakataha.
Koborko on·ani gitade, re·jomaniko dakna permission on·miting somoion, banoba so·sojengjeng ong·anirang ba niam pe·anirang donggenchimode ia re·jomaniko ong·atenggipa dilgiparangkon dosi changen ine u·iatmanahani gimin FKJGP-ni dilgiparangna, East Khasi Hills a·jani Deputy Commissioner Isawanda Laloo, show cause notice-ko on·atahachim.
Indake ong·genchimoba, da·o dipet FKJGP-ni dilgiparang, district administration-oniko maming show cause notice-rangko man·soa dongkuja ine a·kangatskaaha.
Jinma re·jomengmiting somoio dosgri manderangko skatang doka satani gimin Sadar aro Laitumkhrah police station-rango police-rangni mokordoma ka·gipani bidingo janapatskaengon, police-rang iani bidingo sandirokanirangko dakna a·bachengataha ine parakataha.
A·dokni chadamberangna kamrangko ka·e cha·na cholrangko on·jaenga ine matnangenba, re·anggipa Sukrobar salo Federation of Khasi Jaintia & Garo People (FKJGP) dolni gita sorkariko jegale re·jomaniko ong·atanio, re·jomenggipa manderangoni mitamrang, gari gorarangko re·angenggipa dosgri manderangko skatang doka sata dakaha aro uandaken ia re·jomanio adita so·sojengjeng ong·anirangko nikangna gita man·ahachim.
