SHILLONG: Budbar salo, a·dokni Education Minister Rakkam A Sangma baksana Education Department-ni Advisor HM Shangpliang, Vidya Samiksha Kendra-ko Shillong songjinmani Malki-o donggipa Directorate of Educational Research & Training (DERT)-o a·bachengate on·angaha.
Meghalaya sorkarini Education department, Samagra Shiksha State Education Mission Authority of Meghalaya (SEMAM) baksa ia Vidya Samiksha Kendra-ni ning·o a·dokni chadamberangna dingtangmancha nambata lekka poraniko on·e chatro chatrirangni u·i-ma·sianirangko bariatna miksongenga.
Ia Vidya Samiksha Kendra-ko kulie on·angani somoio a·dokni Education Minister, tom·anio dongpae bak ra·giparangna aganprakengon, ia Kendra-ko a·doko a·bachengatanichi chatro chatrirangna bang·en namgnirang donga aro ia Kendra-ko a·bachengatanio neng·nikanirang donggenchimoba ja·mano bang·en namgnirangko man·skagen ine parakataha.
Dingtang dingtang kolrangko jakkalanichi a·doko lekka porani gadangko tang·doatna gita ia Vidya Samiksha Kendra-ko tariaha ineba Sangma aganaha.
Ia tom·anio, Education department-ni Advisor HM Shangpliang-ba jinmana aganprakengon, a·doko Vidya Samiksha Kendra-ko kulianichi lekka porani kamrangko altubatatanisan ong·aigija lekka porako on·ani kamrango parak ong·aniko namdapatna dakchakgen ine parakataha.
Ia Kendra-ni kamrangchin Education department, skulni gadangrangko, skigiparangni skina changaniko aro chatro chatrirangni giminba ma·sina man·gen ineba Shangpliang aganaha.
