DADENGGRE: Guerangni siani bidingo aro sianiko champengani bidingo gue bagan dake cha·enggiparangna agan-talate on·na gita Sukrobar salo, Seminar-ko Dadenggre Block-ni Multi Facility Centre-o ong·atangaha.
Ia Seminar-ko Mission for Integrated Development of Horticulture (MIDH)-ni ning·o West Garo Hills a·jani Project Director (MIDH) ong·atangaha aro ia seminar-o Dadenggre-ni Block Development Officer (BDO) Saljagring G Momin, mongsonggipa sokgipa ong·e bak ra·angaha.
Ia tom·anio ua jinmana aganprakengon, gue bagan dakgiparangoni bang·batan Rongram, Dadenggre aro Gambegre block-rango ge·bata aro ian Garo Hills-ni gipin bakrangoba gipangronga ine aganenba, a·doko bang·a manderangan gue bagan dake janggi tangani cholrangko man·enga ine parakataha.
Dadenggre jolrango gue siani gimin janapangengon, gue bagan dake cha·enggiparang an·tangtangni gue baganrangko nirokjringna nanga aro gueosan ong·aigija gipin gama ge·anirangkoba dakna nanga ine Momin aganaha.
Dingtang dingtang department-ni ning·o on·enggipa sorkari scheme-rangko ra·china aro an·tangtangni janggi tangani gadangrangko nambatatchina gitaba Momin ku·pattiangaha.
Ia seminar-ko ong·atani bidingo West Garo Hills Horticulture-ni Assistant Director Changrime M Momin, talate on·angskaengon, ia jolrango gue sianirangchi a·dokni gipin a·jarangonaba gipangenga ine aganenba, gue sianiko champengna ja·kurangko de·na nangengani gimin aro pangkamgipa janggi tangani cholrangko an·tangtangna tarie ra·na nangengani gimin agan-talate on·angaha.
Ia seminar-ko ong·atanio, gue bagan dake cha·enggipa manderangna agan-talate on·anggipa gipin manderangara, South Garo Hills Krishi Vigyan Kendra (KVK)-ni SMS (Plant Pathology) Dr Tanya R Marak, Rongram C&RD Block-ni Horticulture Development Officer Chisal R Marak, Dadenggre C&RD Block-ni Horticulture Development Officer Jingme A Sangma aro sakgipin Horticulture Development Officer Bryan M Sangma ong·a.
