MGNREGA-ko jakkalsretgipa official-rangni kosako ja·ku de·china dabia

TURA: West Garo Hills a·jani Demdema C&RD Block ning·o MGNREGA-ni kamrango bang·en ong·gija dakanirang donga ine matnanganirangko man·ani ja·man, ia ong·gija dakanio jak donggipa block official-rang aro village employment council (VEC)-ko dilenggipa manderangni kosako rakgipa ja·kurangko de·china Confederation of Meghalaya Social Organisations (COMSO)-ni advisor Cherian Momin, State Rural Employment Society (SRES)-ni Mission Director-ko didiataha.
Demdema Block-o MGNREGA-ni kamrangko jakkalsretanina Dadenggre Sub-Division-ni SDO-chi jakgitele sandirokchina ge·etaniko on·ahani gimin SRES-ni Mission Director-ko mittelpilangengon, adita sak block official-rang aro VEC secretary-rang, MGNREGA-ni record-rangko taridapanio, ong·gija dake job card-rangko on·anio, muster roll-rangko taridapanio aro sorkarini tangka paisarangko jakkalsretanio jak donggiparang ong·a ine ia block official-rang aro VEC secretary-rangni kosako rakgipa ja·kurangko de·china Momin didiataha.
“Inquiry-ko dakanio ja official-rang aro VEC secretary-rangan, MGNREGA-ni record-rangko taridapanio, tangka paisa jakkalsretanio aro pilak ong·gija dakgipa kamrango jak donga ine rim·a man·aha, uandakgipa official-rang aro VEC secretary-rangni kosako niamo pangchake rakgipa ja·kurangko de·china anga didienga,” ine COMSO-ni advisor, SRES-ni Mission Director-na sedoatgipa chittio janapataha.
Mikkangchi sorkarini scheme-rangko jakkalsretani aro ong·gija dakanirang dongjana gita iandakgipa manderangni kosako nanga gita sastirangko on·chinaba Momin didiataha.
“Jeon job card donggipa manderang niam gita ong·ja ine chanchichipanirang donga, uandakgipa VEC-rangna bosturangni bill-rangko gamkujana gita ge·etaniko on·chinaba anga didienga,” ine Momin parakataha.
Mikkangchi sorkarini kamrango iandake ong·gija kamrangko ka·jana gita Block-ni gadango nirokani kamrangko bilakbatatchina didiatengon, “Iandakgipa ja·kurangko de·anichi, songni nokni manderangna miksonge sorkarini on·enggipa scheme-rangko nambate chu·sokatna man·gen,” ine COMSO-ni advisor parakataha.