TURA: Garo Hills-o, mongsongbate West Garo Hills a·jani a·kawe jolrango, bijolini kajinarangko bariata ine matnanganiko Meghalaya Power Distribution Corporation Limited (MePDCL) jegalataha.
West Garo Hills a·jani a·kawe jolrang, chong·motan Rajabala, Phulbari, Bhaitbari, Tikrikilla aro uandakgipa biaprango bijolini kajinako bariate ra·enga aro bijoliko name on·na man·jaenga ine matnangenba, adita salrangna skang jinma tom·bimonganiko ong·atangani ja·man, iako MePDCL jegalataha.
“2015 bilsini November 1 tarik dipet Sub Division-ko jako ra·e chalaienggipa Distribution Franchisee (DF), M/s SAI Computers Ltd, MSERC-ni ra·chakgimin dam aro 2025 bilsini April 1 tarik dipet MeEPDCL-ni on·enggipa apsan damon, kajina jakkalenggipa manderangna bill-rangko tarienga,” ine MePDCL, ia jolrango bijolini kajinarangko bate ra·enga ine matnanganiko raken jegalataha.
Bijolini bill sokaniko Rajabala, Phulbari, Bhaitbari aro Tikrikilla jolrango bijoli jakkalenggipa manderang ma·sisretengasakon ine janapatengon, “Gitcham DF (M/s FEDCO)-ni somoio bijoli jakkalani unit-rangko komibate segatahani a·sel aro mitam nokdangrangnade bill-rangko komibate tariahani a·sel company-na noksan ong·na nangahani giminsa da·o bill-rangko ong·e tariengaha,” ine MePDCL parakataha.
Da·o dipet kosako janapgimin biaprangona agrede West Garo Hills a·jani gipin biaprangonikode bijolini kajinako bariatani bidingo badi ka·anirangko man·soa dongkuja ine janapatskaengon, ia jolrango bijoli cha·uanirangba batenga ine koborrangko man·soahani gimin AT&C-o noksan ong·aniko namdapatna gita bijoli cha·ue ra·aniko dontongna nangenga ine MePDCL parakataha.
