SHILLONG: Adita salrangna skang, Garo Hills-o so·sojengjeng ong·anganina Congress dol, National People’s Party (NPP)-chi chalaienggipa a·dok sorkariko matnangataha aro ia pilakan Bharatiya Janata Party (BJP) aro NPP-ni chalakki dakanisa ong·engnaba gnang ine chanchichipenganiko parakataha.
Iani bidingo kobor ra·timgipa manderang baksa agangrikengon, ia so·sojengjeng ong·ataniko BJP-sa a·bachengatahani gimin ian BJP aro BJP-ni chalakki dakanisa ong·engnaba gnang ine Sukrobar salo, Meghalaya Pradesh Congress Committee (MPCC)-ni president Vincent Pala aganaha.
“Ia a·selna rim·a man·gipa manderangba bang·batan BJP-ni manderangsa ong·a,” ine Pala aganaha.
BJP aro NPP-ni kosako matnangatkuengon, BJP-de pilak biaprangon dingtang dingtang jatrangni gisepo golmal ong·aniko ra·baronga ine Pala aganaha.
“Uamang (BJP), Hindu aro Muslim-rangni gisepo golmalko ra·baronga aro je biaprangon uamang, Hindu aro Muslim-rangni gisepo golmalko ra·bana man·ja, uandakgipa biaprangode uamang, Tribal aro Tribal ong·gijagipa manderangni gisepo golmalko ong·atrongskaa,” ine Pala aganenba, Meghalaya a·dokoba gital party, BJP-ni dakronga gitan Khasi, Garo aro Jaintia-rangni gisepo golmalko ra·bana jotton ka·enga ine matnangataha.
Garo Hills-o ong·enggipa obostarangko BJP aro NPP, altuaen namatna man·aiachim ine janapatengon, Tribal aro Tribal ong·gijagipa manderangni nok-jam aro dokkanrangko so·e galaniara namen kragijani ong·aha ine MPCC-ni president parakataha.
“So·sojengjeng ong·gnini gimin koborrangko man·genchimba sorkari maming ja·kurangko de·jahani a·selan A·chikrangni dokkanrangkoba bang·en so·aha,” ine ua aganaha.
Pala-ni aganani gitade, iani bidingo A·chikrang ding·chaogen inen sorkari name ma·sisoachim indiba sorkari, iako dal·e ra·jaha aro ia obostako name niroksojaha.
GHADC election-ko ra·doatani giminba ua a·dok sorkariko matnangataha.
“Constituency damgniosan neng·nikanirangde dongaiachim aro ia constituency damgniosa uamang election-ko dontongatchengna nangachim indiba uamang (NPP), election-o amako man·na sienga ine ma·sisoahani giminsa election-ko ra·doaha,” ine MPCC-ni president aganaha.
