SHILLONG: Shillong Parliamentary Bye election-na party-ni gita candidate ong·na dambe Maneuel Badwar-ko Meghalaya Pradesh Congress Committee President, Vincent Pala minge nibaaha.
MP sagi Dr. Ricky Syngkon-ni siana skanggipa ian suk ong·gijani dake party iani bidingo mamingkon agangrika dongkujaenga ine Sonibar salo kobor ra·timgiparangna Pala aganaha.
Party-ni gita bang·a bang·gija agan-golpogrikaniko dakaha aro party nipilani dakon dambe aro gitalgipa mikkang jedake Manuel Badwar party-ni candidate-na krachongmotgipa ong·a ine ua aganaha.
Badwar da·o dipet election-o susana maming gisiko sikaniko agankuja indiba iani bidingo official-ni gita ta·raken agangrikanggen.
“Darangba susagipa dongja ong·ode angan susagen aro jeba ong·china chinga candidate-ko gapatelgen,” ine Pala aganaha. Ua party-ni president ong·e a·dokni politics-na gisiko on·a nangnika ine ua agandapangaha.
VPP MP Dr. Ricky Syngkon-ni mejamangmang siani ja·man Shillong Parliamentary Bye election-ko ong·atna nangtelgipa ong·a ineba janapangaha.
VPP-ni gita party-ni palo ku·rang on·timgipa Batskhem Myrboh-ko party-ni candidate dake bye election-na mingbaaha, gipin party-rang iani bidingo parakatkujaenga.
Meghalaya a·doko Congress party-ni bang·bata dilgiparang dongjagemchimoba 2028 bilsio bilona re·bapilna party jotton ka·kuenga.
“2026-27 bilsini election-na tarisamsona chingna namen rakgipa ong·a,’ ine MPCC-ni president Vincent Pala aganaha.
President-rangko songangan baksa party tangchapilna a·bachengengaha, unit-rang aro Block president-rangko party songangengaha ine ua aganaha.
A·dokni politics-o ua chu·gimik somoi on·a nangnikanio Pala aganaha, bang·a manderangan gitcham party-o bakrimpilengaha.
“Jensalo chingni campaign-rangko a·bachengatahaode chinga name dakgen, aro chinga bilona re·bapilengaha ine manderangba ma·sigen,” ine Pala aganaha. Party-oni dilgiparang ong·katanggenchimoba party-na chakgiparang dongkuenga ine ua agandapangaha.
