‘Niam pe·giparangde gong 10,000-ko dai gamna nanggen’
SHILLONG: A·kingrango Nokmarangna on·gimin bilrangko darangba re·badena man·ja ine Robibar salo, Bharatiya Janata Party (BJP)-ni state president aro Tura-ni MDC Bernard N Marak parakatenba, ia niamko manigija gipin biaprangoni re·bae kam ka·e cha·enggipa manderang aro iandakgipa manderangna kamrangko on·gipa manderangde gong 10,000-ko dai gamna nanggen ine mikrakataniko on·angaha.
Dingtang dingtang biaprangoni, Garo Hills-o kam ka·e cha·na aro bading chiwale cha·na re·napbaenggipa manderangna Labour Department aro Garo Hills Autonomous District Council (GHADC)-ni Taxation Department, Nokmarangni office-oniko No-Objection Certificate (NOC) ra·chenggija labour licence aro TNT/hawkers licence-rangko on·aha aro ian Indian Constitution-ni Sixth Schedule ning·o Tribal-rangko chel·chakna Nokmarangna on·gimin bilko pe·ani gita ong·a ine Tura jillani ning·o donggipa Nokma-Sanirang parakatani ja·man Marak-ba Nokma Sanirangna chakpaaniko on·angaha.
Marak-ni parakatani gitade, gipin biaprangoni kam ka·e cha·na re·baenggipa manderangna labour licence aro bading chiwale cha·na re·baenggiparangna TNT/hawkers licence-rangko on·na skang, A·king Nokmarango sing·cheng sanchengn aro NOC-ko ra·chengna nangachim indiba gipin biaprangoni kam ka·e cha·na aro bading chiwale cha·na re·baenggipa manderangna Nokma Sanirango sing·cheng sanchenggija aro NOC-ko ra·chenggija licence-rangko on·aniara, Nokmarangna on·gimin bilko ra·sekani aro niamko pe·ani ong·enga.
“Garo Hills-ni A·kingrango Nokmarangsa pilakni gita bilko man·gipa ong·ani gimin Scheduled Area-rangode pilak kamrangkon Nokmarang ra·chakani ja·mansa ka·na man·a. Nokmarangna u·iatchenggija gipin biaprangoni re·baenggipa manderangna licence-rangko on·aniara, Indian Constitution-ni Sixth Schedule ning·o Tribal-rangko chel·chakna Nokmarangna on·gimin bilrangko ra·sekani aro bilgriatani gita ong·a,” ine Tura MDC parakataha.
A·king Nokmarangni NOC-ko ra·chenggijade licence, certificate ba permit-rangko on·na man·ja janapatengon, Nokmarangni NOC gri gipin biaprangoni kam ka·giparangko kam ka·atgenchimode contractor ba kam nokgiparang gong 10,000 ka·e daiko gamna nanggen aro Nokmarangni NOC gri A·kingrangona re·napbaenggipa labour ba bading chiwalgiparangba gong 10,000 ka·e daiko gamna nanggen ine Marak mikrakataniko on·angaha.
State Societies Registration Act-ni ning·o register ka·gipa development committee-rangde A·kingrango maming bilko man·jani gimin Nokmarangni pal, NOC-rangko on·na man·ja ineba Tura MDC talataniko on·angaha.
