TURA: Baghmara-o donggipa Captain Williamson Memorial Government College-ni 2015 bilsio 1st, 3rd aro 5th semester-ko segipa chatro chatrirang, jemangan bandh aro lockdown-ko ra·gatani a·sel an·tangtangni porikkarangko serikna gita man·jahachim, uamangna dingtangmancha porikkako ong·attaichina gita didie Garo Students Union (GSU) Mindikgre regional unit-ni president Greneth M Sangma, Shillong-o donggipa NEHU-ni Controller of Examinations-na sedoataha.
Greneth Sangma-ni parakatani gitade, salgro salaram jol gimikon NESO-ni bandh-ko ong·atani a·sel 2018 bilsini October jao ong·atna manchigimin porikkako ong·atna man·jahachim aro ia porikkako ra·doatani ja·man 2018 bilsini December jao NEHU-ni gita porikkako ong·atani bidingo u·iataniko on·ahaoba South Garo Hills a·jaode network-rang namrongjae chatro chatrirang, ia u·iataniko niksotokjahachim.
Indake ong·engon, re·anggipa 2020 bilsioba COVID-19-ni bidingo a·song gimikon lockdown-ko ong·atahani a·sel chatro chatrirang, ia porikkako seriktaina man·jaha ine GSU Mindikgre regional unit-ni president parakataha.
GSU Mindikgre regional unit-ni parakatani gitade, 2015-16 bilsini batch-o poraienggipa chatro chatrirangna porikkako gipin college-rangde ong·atpiltokaha aro uamangde untalan graduate ong·tokahaoba Baghmara-o donggipa Captain Williamson Memorial Govt College-nade iandakgipa maming u·iatanirang dongskajahachim.
Iani a·selan porikka serikna man·gijagipa chatro chatrirang da·onan graduate ong·na man·tokkujaenga ine janapatengon, gital u·iataniko on·taie porikkako ong·atpiltaichina gita GSU Mindikgre regional unit-ni president didiataha.