Sonibaronide Corona Centre-ko jakkalna man·gnok: Hek

SHILLONG: Da·o Sonibar mangode Corona Care Centre (CCC)-ko jakkalna man·gnok ine Meghalaya Health Minister, AL Hek Bristibaro aganaha.
“CCC-ko knal attamonin jakkalna man·aignok aro Sonibarode chinga iako chu·gimikan jakkalaignok” ineba Health Minister aganaha jean jean Bristibaro CCC-onaba an·tangan re·ange nieaha.
Health Minister indakeba u·iataha je COVID sabisini chin grigipa manderangko donna gita ia CCC-o ge 300 beds ba a·damrang donggen aro health worker-rangna gipin ge 100 tuchakani a·damrang donggen.
“Noktangona re·angna man·gija donggipa health worker-rang bang·en donga, unigimin ia ge 100 tuchakani a·damrangko uamangna on·skagen,” Minister aganaha.
Unomitingo ua knalo Jaintia Hills-onaba re·ange nirokegen ine Health Minister aganaha.
“Anga knalo Jowai aro Khliehriat-ona re·angenba pilak obostarangko sing·sandie ra·gen aro nanga ong·ode uanoba Corona care centre-rangko dondapatgen,” ua agandapaha.
A·dokni Hospitalrango oxygen-ni obostarangni bidingo sing·anina aganchakengon, da·o dipetode oxygen-na neng·nikani dongkujaenga aro iani bidingo salantian kobor ra·enga ineba health minister aganaha.
Unomitingo COVID tikarangko a·dok man·sotainasiengjok ineba Hek u·iataha.