TURA: South Garo Hills a·jaoba COVID-19-ko man·giparang salantian batrorobaengahani gimin sabisini batrikrikaniko champengna gita district administration, May 24 tarik pring 5:00 bajioni re·baenggipa June 1 tarik pring 5:00 bajiona chu·gimik lockdown-ko ra·gataha ine u·iataha.
South Garo Hills a·jao COVID-ni giproroaniko champengna kamrangko ka·engoba sabisi man·giparang salantian batrorobaengani gimin district administration-ni official-rang, a·jao songdongenggipa manderang aro dingtang dingtang dolrang baksa agangrikangenba, sabisini giproroaniko champengna lockdown-ko ra·gatangaha ine u·iataha.
Lockdown-ni somoio nangchongmotgipa dokkanrang aro sam dokkanrangna agrede gipin dokkanrangko kulina man·jawa aro gari gorarangba nangchongmotgipa bosturangko salruraenggipa garirang, sanna banani kamrangko ka·enggiparang aro gipin nangchongmotgipa kamrangko ka·enggiparangna agrede re·rurana man·jawa.
Bia ka·ani ba mande sianirango skang district administration-oniko permission ra·chengna nanggen indiba sak 15-na bate manderang tom·chimongna man·jawa ine South Garo Hills a·jani official-rang u·iataha.
Lockdown-ni somoio bank aro sorkari office-rangko kulina man·gen indiba mask gangijagipa manderangde office-rangchi napna man·jawa.
Lockdown-ni somoio bostu salruragipa garirang, medical, police, civil defence & home guards, fire & emergency service, MeECL, PHE, agriculture aro veterinary, municipal, PWD, NHAI, FCI, petrol, diesel, LPG, press aro uandakgipa nangchongmotgipa manderangni re·ruraanikode champengani dongjawa ineba u·iataha.