SHILLONG: Meghalaya Chief Minister Conrad K Sangma, mni Sukrobar salo kobor ra·timgiparangna parakatengon, NPP-chi bakrime rikdilenggipa MDA sorkari, Garo aro Khasi-Jaintia jatrangna a·dokko dingtang bak dake on·ani bidingo maming daken cholko on·a nangnikkujaenga ine aganaha.
Meghalaya a·dokko jakgitel man·a, skango bang·a dilgiparang an·tangtangko on·kange dakgrikangako mesoke aganengon, chief minister, MDA sorkarini a·bachenge miksonganide, a·dokna namdap-sildapaniko ra·banasan mikpakma nienga aro Garo, Khasi-Jaintia jatrangna a·dokko dingtang dingtang a·dokna bak dakna dabianio sorkarini gitade maming chanchisoanian dongja ine aganaga.
A·dok dingtangko man·anichi namdap-sildapaniko ra·bana gita man·-gen ine mitam manderang chanchisoenga, indiba uandake chanchisoani gisikrang donggenchimo-ba an·chingni a·dok-chigako namdap-sildapatna ja·kurangko de·engani gimin, uandakgipa cholko ra·na miksonganiara agitchasa ong·ramaigen ineba Sangma parakataha.
Indake ong·engon, adita salrangna skango mangmangsan Garoland State Movement Committee aro Hill State People’s Democratic Party dolgni a·dok dingtangko jat gittamna dabiani bidingo apsan tom·e chanchirimangahachim.
Bak dakna nangnikjaenga inanina GSMC, Conrad-ko jegala: National People’s Party (NPP)-chi dilenggipa Meghalaya Democratic Alliance (MDA) sorkari da·o dipet Meghalaya a·dokko A·chikrangna dingtang aro Khasi-Jaintia-rangna dingtang dake bak dakna maming miksonganirang dongkuja ine aganahani gimin Garoland State Movement Committee (GSMC), Meghalaya a·dokni Chief Minister Conrad K Sangma-ko jegalataha.
GSMC-ni co-chairman Balkarin Ch Marak-ni parakatani gitade, Conrad Sangma-ni pagipa aro Lok Sabha-ni gitcham Speaker Purno A Sangma sagian, Garoland a·dokko aro Khasi-Jaintia a·dokko bikotani bidingo chanchidilchenggiparangoni saksa ong·paachim indiba dingtang a·dokko nangja ine Conrad Sangma-ni agananiara pagipani jumangkon kimite galani gitasa ong·skaengachim.
“An·tangni chanchidilani gitan Purno Sangma, dingtang a·dokko bikotani bidingo baditaba chang Parliament-o ku·rangko on·aha aro iani giminsa ua 2014 bilsioba Lok Sabha-ni MP-na seokako man·taiahachim. Purno Sangma-ni siangani ja·man uni depante Conrad Sangma, pagipani jumangrangko chu·sokatskagen ine Garo Hills-ni manderangna ku·rachakahachim indiba da·alo ua pagipani jumangkon kimite galnasa jotton ka·engaha,” ine GSMC-ni co-chairman parakataha.
Dilgiparangni rakbee kamko ka·ani a·selsa Meghalaya a·dokko man·aha ine adita salrangna skangsan a·dokni Chief Minister Conrad Sangma talatangenba, da·o dipet Meghalaya a·dokko A·chikrangna dingtang aro Khasi-Jaintia-rangna dingtang dake bak dakna miksonganirang dongja ine parakatahachim.
Indake ong·engon, A·chikrangna dingtang aro Khasi-Jaintia-rangna dingtang a·dokko dabina gita GSMC aro Hill State People’s Democratic Party (HSPDP) dolrang nangrime ku·mongmanaha aro ia kamko chu·sokatkujaskal uamang neng·takjawa ine GSMC-ni co-chairman parakatskaaha.
