SHILLONG: Tom·tomaniona re·bapilna gita sorkari baksa agangrikna nangnikenga ong·ode an·tangtangko bame on·chengna nanggen ine Meghalaya a·dokni Chief Minister Conrad K Sangma, a·doko bobil dake chakatenggipa Hynniewtrep National Liberation Council (HNLC) dolko didiataha.
Sorkari baksa agangrikna skaniko parakani ja·manoba maming ja·kurangko de·kujaengani gimin HNLC bobil dol, a·dokni dingtang dingtang biaprango bomarangko goprete so·sojengjeng ong·atengachim ine nikna man·a.
Re·anggipa Mongolbar saloba Shillong songjinmani Laitumkhrah jolo IED boma gopretanichi mande sakgni saknaanirangko man·na nangahachim.
Indake ong·engon, HNLC bobil dol baksa agangrikaniko dakdilna a·dok sorkari kusi ong·enga indiba sorkari baksa agangrikna HNLC dolo maming niamrang dongskana nangjawa ine Chief Minister parakataha.
“Uamang (HNLC) sorkari baksa agangrikbebena nangnikenga ong·ode bame on·chengna nanggen. Chinga uamang baksa agangrikna kusi ong·aigen indiba dolgnini gisepo agangrikaniara a·songni niamrango pangchakesa ong·na nanggen,” ine Sangma aganaha.
HNLC bobil dol, so·sojengjeng ong·atani kamrangko watgale tom·tomaniona re·bachenggenchimosa agangrikaniko dakna man·gen ineba Chief Minister parakataha.