Sixth Schedule-ko taridapani bidingo Conrad, a·dokni ADC-rang baksa chanchirima

SHILLONG: Constitution-ni Sixth Schedule-ko taridapani bidingo chanchirimna gita Sukrobar salo Meghalaya a·dokni Chief Minister Conrad Sangma, a·dokni damgittam Autonomous District Council (ADC)-rang, chong·motan Khasi, Jaintia aro Garo Hills Autonomous District Council-ni chief executive membor-rang baksa tom·aniko ong·atangaha.
Tom·a matchotani ja·mano kobor ra·timgiparangna talataniko on·angengon, Constitution-ni Sixth Schedule-ko taridapani bidingo ua damgittam ADC-ni CEM-rang baksa re·baenggipa August 25 tariko tom·e chanchirimangtaigen ine Chief Minister parakataha. Damgittam ADC-ni recommendation-ko antisani gisepon sorkarina on·china gita ge·etmanaha ineba Sangma aganaha.
“Ia Bill-ni bidingo chingni nangnikanirangko aro ku·pattianirangko on·china ma·mong sorkari chingna u·iatmanaha. Da·alni tom·anio chinga Sixth Schedule-o taridapna nangenggipa dingtang dingtang kamrangko niangaha aro iani bidingo chinga changgipin tom·anioba chanchiangtaigen,” ine Chief Minister parakataha.
Chief Minister-ni parakatani gitade, ia Sixth Schedule-ko taridapanio da·o dipet 95 percent-ni gita ku·pattianirangko ra·manaha aro changgipin tom·anio iarangni bidingo talbate chanchianggen.
Indake ong·engon, ia Sixth Schedule-ko taridapanio agre somoiko ra·engani gimin KHADC-ni CEM Titosstarwell Chyne, suk ong·gijaniko parakatskaaha.
KHADC CEM-ni parakatani gitade, re·anggipa July 5 tarikon a·dok sorkari, iani bidingo bon·kame Home Affairs Ministry baksa chanchirimangahachim.