SHILLONG: Garo Hills Autonomous District Council (GHADC) aro Jaintia Hills Autonomous District Council (JHADC)-na sorkarini chamatgipa tangka paisarangko jakkalsreta ine matnanganirangko Directorate of Local Fund Audit (DLFA)-ni gita am·sandiengon, ia district council damgnio tangka jakkalsretanirangko inquiry dakani report-ko ia bilsini bon·angachibara on·naba gnang ine ka·dongsoenga.
Official-rangni u·iatani gitade, GHADC-o audit ka·ani 60 percent-de matchotaha aro JHADC-oba account-rangko audit ka·ani matchotmanahani gimin da·o report-ko tarinasanjok.
GHADC-ni account-rangko re·anggipa bilsini November 10 tarikon DLFA-ni gita audit ka·na a·bachengahachim indiba December jao chutti ong·ani ja·man January aro February jarangoba kam ka·giparangni jingjengatani a·sel audit ka·aniko dontongchengna nangahachim. Apsan daken, JHADC-oba COVID-19-ni giproroaniko champengna lockdown-ko ra·gatani a·sel audit-ko dontongchengna nangaha ine official-rang parakataha.
“GHADC-o audit ka·aniko a·bachengpiltaiaha aro kamrangko ta·raken matchotatna jotton ka·enga. JHADC-ode audit ka·aniko matchotmanaha aro da·o report-ko tarina siengaha,” ine official-rang parakataha.
Ia district council damgnion, bilsi 10-ni account-rangko DLFA-ni gita audit ka·engachim.
“Audit report-rangko ia bilsini gisepon sorkarina on·na man·gen ine chinga ka·dongenga. Audit report-ko skanggipa Finance department-na on·atchenggen aro uni ja·man District Council Affairs department-na on·atgen,” ine official-rang parakataha.
Koborko on·ani gitade, GHADC aro JHADC-na ma·mong sorkarini chamatgipa gong kror 264 tangkarangni giminsan ong·aigija batanggimin bilsi 10-ni gisepo ia district council damgnini account-rangko am·sandichina gita sorkari ge·etaniko on·ahachim.