TURA: East Garo Hills a·jaoba COVID-ko man·ani da·o adita komiangkalahani gimin adita niamrangko olgrokataha ine East Garo Hills a·jani Deputy Commissioner u·iataha.
Walni curfew-ko walantian attam 7:00 bajioni pring 5:00 bajiona ra·gatangkugen indiba ian sipai dolrangna, medical-ni manderangna aro nangchongmotgipa bosturangko salbaenggipa garirangnade maming nangchakeani dongjawa ine DC u·iataha.
East Garo Hills a·jao pilak dokkanrangkon Sombar saloni Sonibar salona pring 8:00 bajioni attam 6:00 bajiona kulina man·gnok indiba Robibar salode dokkanrangko chipe donangkuna nanggen. Dokkanrango tika su·a su·gijaniko see tape donna nanggen ineba DC u·iataha.
Mande salruragipa garirang, jekai auto, taxi maxicab aro uandakgipa garirangko salo 50 percent ka·e re·rurana on·gen indiba garini mikkango tika su·a su·gijaniko see tapna nanggen ineba DC parakataha.
Da·o dipet antio changprak kuligipa bazar antirangkoba kulina man·kujawa.
Deputy Commissioner-ni u·iatani gitade, skul, college, gilja nok aro uandakgipa biaprangkoba da·ode sorkarini dongimin niamrango pangchake kulipilna man·gnok aro sorkari office-rangkoba skango gitan chu·gimik bilchi attam 5:00 bajiona kulina man·gnok.
Kam nangchongmotana nokoni ong·katengon, mask-rangko ganjringchina, saksa sakgipinoni chel·tangrike dongchina aro rongtal an·talaniko rakkichina gitaba DC u·iataha.
Mande jinmani biaprango aro kam ka·chakram biaprango skatang stujachina aro ta·makkurangko jakkaljachina gitaba DC mikrakataniko on·angaha.
Sorkarini dongimin niamrangko pe·genchimode Epidemic Disease Act 1897-ni Section 2-ni ning·o on·gimin bilrango pangchake dongimin officer-rang, ja·kurangko de·anggen ineba DC mikrakataha.