TURA: Adita salrangna skang gimaenggipa mande saksani sigimin manggisiko Tura-ni sambao donggipa Chasingre jolo chiakoloniko man·aha.
Koborko on·ani gitade, Tura Chandmari-oni saksa Rotneswer Rai minggipa mandeni bilsi 59 ong·gipa depante Telleswer Ch Marak, salgittammangna skang gimaahachim. Ua Chasingre-o an·tangni ma·drang nanggipa mandeni bagano kam ka·na gita re·rongachim ine kobor on·aha.
Salgittammangni ja·man, jolni manderang ia chiakoloniko chi ko·na re·angon, ia mandeni sigimin manggisikosa chio balboe dongako nikeaha ine kobor on·timgiparang u·iataha.
“Ua chiakolo ga·ake siakon ine chinga chanchichipenga indiba post mortem report-ko man·ahaon chinga uni siani a·selko ma·sina man·gnok. Post mortem matchotani ja·man uni manggisiko uni ma·drangna pakwate on·ataha,” ine Police-rang parakataha.