TURA: South West Garo Hills police-rang West Garo Hills police team-ni dakchakanichi, noti-dari dakchina a·dok gipinchi me·chik palbadingatao mongsonggipa jak donggipa sakbri me·chikrangko rim·a man·aha aro a·dok gipinchi palbadingatna rimbagipa saksa bilsokkugijagipa me·chik bi·sako man·chape, sakgni me·chikrangko naljokatna man·aha ine koborna u·iataha.
Ia bilsi a·bachengachibara February jao me·chik sakgni gimaanganina Ampati Women Police Station-o missing report on·gipao pangchake police-rangni sing·sandie ra·ani ja·mano, me·chikrang sakbriko rim·a man·tokskaaha.
Police-rangni ia mamlani bidingo sing·sandie ra·aniko dakengmitingo ma·sie ra·ani gitade, saksa me·chikko Haryana-ni Mahendergarh District-ona rimange, uko bia ka·china ine palbadingataha. Uandake, saksa bilsokkugijagipa me·chik bi·sakoba apsan miksonganinan Rajasthan-ni Jhunjhunu District-ona rimangskaaha.
South West Garo Hills police team, West Garo Hills police-rangni dakchakanichi mejal Robibar salo dos dakgipa me·chikrang sakgniko Tura-oniko rim·a man·tokahaon, sakgipin dos dakgiparangko Tikrikilla-oniko rim·a man·eskaaha.
A·jani police official-ni parakani gitade, police-rangni sing·sandie ra·anio sak gittam dos dakgiparangan gipinrangni dakchakanichi ua me·chik bi·sarangko Haryana-ona rimangachim ine ku·rachakaha.
Uandake brigipa dos dakgipa mandeara, Tura songjinmaonin ong·a aro ua da·o Haryana-on dongengachim, ua me·chikkoba Garo Hills-ni me·chik bi·sarangko gipin jatrang bia ka·china gita pa·sike palbadingatronganichi dos dakengani gimin police-rang rim·e ra·eaha.
Indake ong·engon, palbadingatako man·gipa me·chikrang sakgniko naljoke uamangni songdongram biap Tura-onan rimbapile uamangni nokdangni manderangni jakon pakwatangaha aro dos dakgipa sakgipin manderangko rim·na gita police-rang sing·sandie ra·aniko dakangkuenga ineba koborna parakaha.
Iandakgipa a·sel obostarangko nikna man·engon South West Garo Hills Superintendent of Police, Siddharth Ambedkar, jolo donggipa manderangna, maibakae saoba me·chik bi·sarang nokoni gimaenga ong·ode ta·raken sepangbatgipa police station-rangona kobor on·china gita didianiko on·angjolaha.
