TURA: Adita salrangna skang, Tura-ni Home Science College-o kragija dake jakkalako man·gipa me·chik sakgnina, ‘mental disturbance certificate’-ko on·china college-ni Registrar, ge·etaniko on·ahani gimin Tura-ni Mothers Union, ia college-ni dilgiparangko raken jegalataha.
Tura Home Science ba Community Science College-ni Dean Pushpita Das, an·tangni ning·o kam ka·giparangko aro college-o poraienggipa chatrirangko, nokni kamrangko ka·atenga aro an·tangni be·enrangko kragija dake nol·atenga ine adita salrangna skangsan college-o poraienggipa chatrirang aro kam ka·giparang badi ka·doangahachim aro iani ja·man ia college-ni Dean-ko kamoniko ra·galchina aro uni kosako nanga gita sastirangko on·china dingtang dingtang dolrang dabitokengachim ine nikna man·a.
Koborko on·ani gitade, ia college-o kam ka·enggipa me·chik sakgniko ia college-ni dean, uamangni kamrang baksana an·tangni nokoba kragijagipa kamrangko ka·atrongachim aro iani bidingo college-ni chatrirang aro kam ka·enggipa manderang, Tura Women’s Police Station-o FIR-koba ka·doangahachim.
Ia me·chik sakgniko, college-o kamtangtangko matchotani ja·manoba ua an·tangni dongchakenggipa quarter-ona rimange, mi bijakrangko song·na, rongtal an·talatanirangko dakna aro walni 9:30 bajirangona kingking an·tangni be·enko nol·atna jakkalrongengachim ine uamang badi ka·doangahachim.
Indake ong·engon, college-o kam ka·gipa me·chikrangko iandake ong·gija kamrangko ka·atahani gimin aro ia me·chik sakgnina ‘sko tik ong·gijani certificate’-ko on·china ge·etahani gimin Mothers Union, ia college-ni dilgiparangko matnangatskaaha.
“Mandena certificate-ko on·achi uko gisik tik ong·ja ine aganna man·aiama? Iandake saksa College-ko dilenggipa registrar-ni agananiara namen jegalna kragipa kam ong·aha aro ian kal·ake roako man·gipa manderangna university-ni gita maming dakchakanirangko on·na gisiko nanggijaniko mesokani ong·enga,” ine Mothers Union-ni president Sume CB Sangma parakataha.
Kal·ake roa man·gipa me·chik sakgniko college-ni Internal Complaint Committee (ICC)-ni gita maming dakchakanirangko on·na man·jani gimin Deputy Commissioner aro gipin officer-rangni ning·o donggipa Local Complaint Committee (LCC)-ona watatskaaha ineba Mothers Union-ni president parakataha.
Ia college-ko dilenggipa dean-ni kosako badi ka·ani ja·manoba ia me·chik sakgnini kosako sinjetanirangko on·na jotton ka·engkua ineba Sangma parakataha.
“Ia me·chikrangni kosako kal·ake roanirangko nike chinga iako jako ra·na manchiahachim indiba ia me·chikrangna ‘sko tik ong·gijani certificate’-ko on·china ia university-ni registrar ge·etaniko on·ahani gimin chinga uamangni kosako jegalaniko mesokna gita iani bidingo kobor ra·timgiparangna u·iatskaenga,” ine Mothers Union-ni president parakataha.