SHILLONG: Greater Ampati Water Supply Scheme (GAWSS)-ko matchotningjaengani gimin Bristibar salo, Ampati-ni Congress MLA Miani D Shira, NPP-chi dilenggipa MDA sorkariko matnangataha.
Bristibar salo ia Water Supply Scheme-ni gimin Assembly-ni Question Hour-o chanchirimdilangengon, ia scheme-ni kamrangko sorkari dontongatahama ine Shira, sorkariko sing·doangaha.
Ia nangchongmotgipa project-na taritaigimin korosko basako sorkari ra·chakeming matchotatna miksongenga ineba Miani sing·doangaha.
Ampati MLA-ni sing·anirangna aganchakaniko on·angskaengon, ia water supply scheme-ni kamrang 70 percent-ni gitade ong·angengaha aro ia project-na gong lak 8700.00-ko on·atmanaha ine a·dokni PHE Minister Renikton Lyngdoh Tongkhar parakataha.
Ia project-ko dontongsrangade ong·kujaenga ine talataniko on·angengon, ia water supply-ni kamrangko ua an·tangba chu·ongnikjaenga ine Tongkhar parakataha.
Dingtang dingtang a·selrangchi ia GAWSS-ko matchotningjaenga ineba PHE Minister talataniko on·angaha.
PHE Minister-ni parakatani gitade, ia project-ni kamko 2012-13 bilsion sanction ka·ahachim indiba kamko 2017 bilsiosa contractor-na pakwate on·aha aro ia project-ni korosko taripiltaina gita proposal-ko 2018-19 bilsiosa on·ahachim.
“Ia sorkari tangka paisani gita neng·nikanirangko chagrongna nangengoba, indita bilsirangna matchotgija donenggipa kamko matchotatna jotton ka·enga. Anga bebera·a ia project-na gital taritaigimin korosko sanction ka·ahaode ia kamko matchotatna man·gnok,” ine PHE Minister aganaha.