TURA: Septembet jagimikna manienggipa Poshan Maah-ni bak gita Bristibar salo, dingtangmancha program-ko Zikzak Block-ni Bhoirakupi Anganwadi centre-o ong·atangaha.
Ia program-ko ong·atani bak gita dingtangmancha Anganwadi centre-rango, skulrango aro manderangni nokrangoba me·su baganrangko dakchina didina gita bite nanggipa bol aro me·su ge·anirangkoba dakdilangaha.
Ia program-ko ong·atanio Zikzak-ni gitcham MDC Bhupendra Hajong, mongsonggipa sokgipa ong·e jinmana aganprakangengon, skangode manderang noktangtangon me·su samjakrangko ge·e cha·tokaiachim indiba ia sal somoirangode bang·bata manderangan bazar antirangonikosa me·su samjakrangko bree cha·engani a·sel be·enna namgipa vitamin-rangko chu·onge man·jaenga ine parakangaha.
Ia tom·anio Betasing ICDS Project-ni CDPO ZRR Marak-ba jinmana aganprakengon, bilsianti ia Poshan Maah-ko maniani orto aro miksonganirangko jinmana talate on·angskaaha.
Ia program-ko ong·atanio dingtangmancha bijak song·susaanikoba ong·atangaha aro susaanio skanggipa boksisko Nidhoni Hajong, gnigipa boksisko Seema Hajong aro gittamgipa boksisko Mondakani Hajong cheangaha.
Ia program-ko ong·atanio dongpae jinmana aganprakanggipa gipin manderangara, Zikzak PHC-ni Medical & Health Officer Dr Arundhuti Hajong, Zikzak ICDS Project-ni CDPO TK Marak aro gipinrang ong·a.
