SHILLONG: Shillong Medical College-ko ta·rake matchotatchina dabie, Budbar salo Khasi Students Union (KSU)-ni dilgiparang, Meghalaya a·dokni Health Minister James K Sangma-na memorandum-ko on·angaha.
“Meghalaya a·doko medical-ko poraina nangnikenggipa chatro chatrirang bilsiantian batroroengani gimin Shillong Medical College-ko ta·raken matchotate on·china chinga didienga,” ine KSU-ni dilgiparang, Health Minister-na seatgipa chittio parakataha.
A·doko medical college-rangko matchotate on·ningjaenganiara sorkarini gisiko nanggijaniko mesokani gita ong·enga ine janapatengon, Shillong medical college-ko rikna gita 2017 bilsion gitcham sorkari, Shillong songjinmani Reid Chest hospital-o pangchakaniko songe on·ahachim aro ja·mano ia hospital-ko rikna gita biapko Umsawli-ona apjitangskaahachim indiba da·alona kingkingan ia college-ko rikanirang matchotkujaenga ine KSU parakataha.
Medical college-ko matchotningjaengani gimin suk ong·gijaniko parakatengon, iani bidingo KSU, changni chang sorkarina u·iatahachim indiba kamrang apsan daken ja·donggae dongengkua ine KSU-ni dilgiparang parakataha.
Ia medical college-ko rikna gita Kolkata-ni Kali Pradip Choudhuri (KPC) minggipa company-na on·ahani giminba KSU suk ong·gijaniko parakataha aro ia college-ko rikna on·aniko nipiltaichina gita sorkariko didiataha.