TURA: Bristibar pringwalo, Tura-oni Shillong-ona re·angenggipa MTC bus garini a·sel ong·anio sianggipa sakdok manderangoni saksade COVID duty ka·gipa nurse aro sakgittamde college-o poraienggipa chatro chatrirang ong·achim ine ma·sina man·aha.
Ia gari a·sel ong·anio sianggipa nurse-ara Williamnagar Rangmal Badima-oni bilsi 26 ong·gipa Dismi M Sangma ong·achim aro ua Baghmara Civil Hospital-o kamko ka·gipa ong·e COVID-19-ni kamrangkoba ka·engachim. Ia a·sel ong·ani somoio uaba an·tangni kam nangana Shillong-ona songreangengachim.
Bus gari a·sel ong·anio sianggipa chatro chatri sakgittamoni saksade B.Sc (Chemistry)-o topper ong·gipa chatro Traiwin R Marak ong·achim aro ia a·sel ong·ani somoio ua Shillong-o M.Sc-ko dakna gitasa re·angengachim.
Chatro chatri sakgittamoni sakgipinara Williamnagar Balsrigittim-oni bilsi 18 ong·kuenggipa Chekamchi G Momin ong·a aro saksara Williamnagar Old PWD Colony-oni Tengsimbirth M Sangma ong·skaachim.
Ia somoirango COVID-ni obostarang namkalange skul, college-rangko kulipiltaiengahani giminsa bang·bata chatro chatrirangan, an·tangtangni admission-rangna aro gipin kamrangna Shillong-ona re·angtokengachim.