TURA: An·tangni constituency-ni ning·o nambata sanna banani cholrangko on·na man·na gita adita salrangna skang, Rangsakona-ni MLA Zenith Sangma, SRWP 2021-22-ni ning·o Advanced Life Support (ALS) Ambulance-ko Rangsakona Ambulance Management Committee-ni jako pakwate on·angaha.
Ia ambulance-ko pakwate on·na gita dingtangmancha tom·aniko Rerapara C&RD Block-ni ning·o donggipa Garobadha PHC-o ong·atangaha aro ia tom·anio Dengnakpara-ni MDC Sadhiarani M Sangma, Rerapara-ni BDO RZD Shira, Sr M&HO Dr Lydia Marak aro Garobadha PHC-o kam ka·enggipa gipin manderangba bakko ra·angaha.
Ia ALS ambulance-o bilonge saenggiparangna nangchongmotgipa dingtang dingtang bosturang donga aro da·o dipet iandakgipa ambulance-rang Meghalaya a·dok gimiko bolgittamsan dongengkua ine nikna man·a.
