SHILLONG: Urban Affairs department-ni u·iatgipa Meghalaya Building Bye-Laws-ara manderangni nangnikani gita ong·jani gimin ia Building Bye-Laws-ko Khasi Hills Autonomous District Council (KHADC) ra·chakna man·jawa ine KHADC-ni Executive Membor Paul Lyngdoh parakataha.
Budbar salo Lyngdoh-ni kobor ra·timgiparangna parakatani gitade, a·dokni damgittam district council-rango Building Bye-Laws-ni executive membor ong·enggiparang baksa apsan chanchirimanio songgigrikgiminko a·dok sorkari, ia niamo ra·chapjahani a·sel ia Building Bye-Laws-ni bidingo manderang jajaani ong·katengahachim.
“Scheduled a·jarango ga·akgipa biaprangkode district council-na pakwatchina gitasa chinga sorkariko didiahachim indiba 2021 bilsini gital bye-laws-osan ADC-rangkode janapaiaha,” ine KHADC-ni Building Bye-Laws EM in-charge parakataha.
Ia gital building bye-laws-o ADC-rangni a·jarangni giminde name talataniko on·jaha ineba Lyngdoh parakataha.
Lyngdoh-ni aganani gitade, scheduled a·jarango square feet 50,000-na bate a·a donggipa manderangnade MUDA, permission-ko on·gen ineba ia gital bye-laws-o janapani gnangchim aro ian manderangna namen jajaatani ong·engachim.
“Scheduled a·jarangde district council-ni ning·osa ga·akani gimin ian ra·chakna amgijani ong·enga. A·arang dal·aiani gimin a·dok sorkarini ning·o ga·akna man·ja,” ine Lyngdoh parakataha.
Indake ong·engon, ia gital building bye-laws-ko tarianiara a·dokni damgittam district council-rang baksa chanchirimanio tik ka·gimin gita ong·ja ine KHADC-ni EM parakatenba, iani bidingo district council-ni executive membor-rang baksa gital dake chanchirimtaina nanga ine a·dokni Urban Affairs Minister-o dabiangaha.