TURA: India a·songni dingtang dingtang a·jarango COVID-19-na tika su·anirang komiengani gimin tika su·aniko bariatchina gita a·songni Prime Minister Narendra Modi ge·etaniko on·manahani gimin Tura-oba COVID-na tika su·aniko bariatna gita Sombar salo District Task Force-ni tom·aniko Tura-ni Circuit House-o ong·atangaha.
Ia tom·anio West Garo Hills a·jani Deputy Commissioner Ram Singh, tom·anio bak ra·giparangna aganprakengon, vaccination drive-ko ong·atanichi tika su·ani 88 percent gapahachim indiba Asanang, Darenggre aro uandakgipa gipin biaprang, Tura jillani sambaon ong·genchimoba tika su·anirang komikuenga ine parakangaha.
West Garo Hills a·jao COVID-19 man·giparangni gimin janapangengon, ia bilsini February jaoni June jaona kingking somoi gita tikarangko su·e on·na man·ahani a·sel, gnigipa changna COVID-ni giproroanio manderangko chel·chake rakkina aro COVID man·e sianirangko bewalan komiatna man·aha ine Singh parakataha.
An·tangtangnasan ong·aigija sakgipinrangni namgninaba chanchie, tika su·kugijagiparangko ta·raken su·e ra·china gitaba West Garo Hills a·jani DC didiangaha.
Ia sal somoirango bia ka·ani aro uandake jinma kusi ong·e maniani salrang ong·engahani gimin COVID-19-ni giproroaniko warachakna man·na gita tika ponggni su·mangimin manderangkosan iandakgipa jinma tom·anirango bak ra·na on·aigen aro iandake jinma tom·anirango COVID-ni niamrangko ja·rikangkuna nanggen ineba Singh aganaha.
Skulrangkoba da·o kulitokengahani gimin skulo poraienggipa bi·sarangnade tikarang dongkujae kenchakna nanganirang ong·kuenga ine talatangengon, bi·sarangko chel·chake rakkina gita ma·a paarang aro skigiparang an·tangtangan tikarangko su·e ra·skana nangchongmotenga ine Deputy Commissioner parakataha.
Office-rango kam ka·enggipa mande sakantian tikarangko su·e ra·china aro tika su·kugijagipa manderangkode sal 10-prakon RTPCR test report-ko on·skachina gitaba ua dingtang dingtang department-ni dilgiparangko ge·etangaha.
West Garo Hills a·jao COVID tika su·aniko matchotatna man·na gita mande sakantikon bakrimchina gitaba ua didiangaha.
Ia tom·anio West Garo Hills a·jani DMCHO Dr Ivonne M Sangma, a·jao tika su·ani gadangni bidingo talataniko on·angskaengon, November-ni 2 tarikona kingking West Garo Hills a·ja gimiko tika su·chakgipa dam 9160 biaprango tikako su·e skanggipa tikako sak 2,10,178 aro gnigipa tikako sak 1,22,501 su·e ra·mantokaha ine parakangaha.
November 8 tarikoni November 12 tarikona Tura-ni dingtang dingtang biaprango tika su·ani program-ko pring 10:00 bajioni attam 3:00 bajiona ong·attaienga ine parakatengon, ia cholko ra·e tika su·kugijagipa pilak manderangkon su·e ra·rikchina gita Dr Sangma didiataha.
Ia tom·anio Nokma Council-ni president SG Momin, Tura-ni DMHO Dr M Sangma, dingtang dingtang department-ni officer-rang, ABDK-ni membor-rang aro gipinrangba dongpae bak ra·angaha.