SSA skigiparangni kamko regularise ka·ani bidingo ku·rachakaniko on·jaenganina CM-ko matnanga

 

SHILLONG: Meghalaya a·dokni Samagra Shiksha Abhiyan (SSA) skulrango skigiparangni kamko regularise ka·china dabienggipani bidingo maming ku·rachakanirangko on·na man·jaengani gimin Meghalaya SSA Schools Association (MSSASA), a·dokni Chief Minister Conrad Sangma-ko matnangataha.

MSSASA-ni president Aristotle Rymbai-ni kobor ra·timgiparangna parakatani gitade, SSA skigiparangna kam on·ani aro skigiparangni kamrangko nirokanide a·dok sorkarini jakon ong·engachim aro ma·mong sorkaride tangka paisani gita dakchakanirangkosan on·aiachim.

SSA skigiparangko nirokanide a·dok sorkarini daitoan ong·achim ine janapatengon, SSA-ni dongimin niamrango pangchake SSA skulrango skigiparangna dormaharangko tarianiba a·dokni niamrangon pangchakachim ine Rymbai parakataha.

SSA program-ko India sorkari, dingtang dingtang skulrang donggijagipa biaprango ra·gate, 90 percent tangka paisarangko dakchake on·engani gimin kamrangko regularise ka·aniara a·dok sorkarini bilo ong·ja ine adita salrangna skang Chief Minister aganahachim ine nikna man·a.

Indake ong·engon, chief minister-ni iandake agananiko MSSASA jegalatskaenba, iandakgipa kattarangko aganna skang ua kakketko name am·sandichengna nanga ine parakatskaaha.

Iani bidingo MSSASA, 2016 bilsio ma·mong sorkari baksaba agangrikahachim aro uamangni agangrikanio pangchake a·dok sorkariko niatchina gita ma·mong sorkari ge·etaniko on·manahachim ineba Rymbai parakataha.

“Batanggimin bilsi gittamni gisepo a·dok sorkari, gong kror 104 tangkarangko on·chipgija donenga aro adita salrangna skangba ma·mong sorkarioniko gong kror 59 tangkarangko man·soahachim. Gimikko chanede da·o a·dok sorkario gong kror 163 tangkarang donga aro ia gong kror 163 tangkarangara skigiparangni jabongani dormaharangko on·na chu·ongachim,” ine MSSASA-ni president parakatenba, maini gimin gong kror 104 tangkarangko on·chipjaenga ine a·dok sorkariko sing·doangaha.