SHILLONG: Karnataka sorkarini Directorate of Minorities Welfare-ni Christian dolko survey ka·ani bidingo suk ong·jae Meghalaya cabinet Minister Sanbor Shullai, Prime Minister Narendra Modi-ko ia mamlako nirokatchina mol·molate chittiko seataha.
Bangalore Peter Machado-ni Arch Bishop-ba survery ka·aniko namnikjae jegalataha aro toromni gita survey ka·aniko niam-bidikni kosako ong·a ine aganako Shullai, uni chittio janapataha.
“Sakantian an·tangtangni bebera·ao pangchake toromko basena bil donga. Je mandean obostao pangchake cholko ra·e niamko an·tangtangni jako ra·a, uamang Karnataka a·doko dongenggipa Christian dolna ka·donggijaniko on·a, ian namen kragijani ong·a” ine ua aganaha.
“Indake Arch Bishop aro gipin Christian dolni ra·dogipa mamlako namen dake sandie nirokatchina mol·molatenga aro Karnataka-o dongenggipa Christian manderangni chelchak-naljokanikoba nirokatpachina mol·molatenga, ine Shullai, uni chittio janapataha.”
