SHILLONG: Meghalaya Congress dolni dilgipa gitcham Mukul Sangma aro sak 11 MLA-rangni doloni ong·kate Trinamool Congress (TMC)-o bakrimaniko “political suicide” ba “political-o an·tangna ja·ga saa” ine Meghalaya Congress-ni a·gipi dilgipa aro Khasi Hills Autonomous District Council (KHADC)-ni gitcham chief executive member (CEM) PN Syiem matnangataha.
Meghalaya-ni sak 12 MLA-rang, unoni a·dokni gitcham chief minister Mukul Sangma mang re·anggipa jao doloni ong·kate bang·gija salrangna skang mangmang TMC-o bakrimeaha.
“Uamangnade Political-o an·tangtangna ja·ga saa gitasa ong·aha. TMC dolko Meghalaya a·doko dal·roroate a·dokni chief minister ong·pilgen ine Mukul Sangma chanchiengnaba donga. Indiba, ian namen ong·jawaha. 2023 bilsio ua bilona re·bapilna gita man·jawaha,” ine PN Syiem aganaha.
“Mukul Sangmani songdonggipa a·dok-chiga Garo Hills-ni manderang aro local dilgiparang baksa anga golpoani dakangaha, aro uamangni ma·sisoani gitade Mukul Sangma ge·gitam seatrangna agrede re·baenggipa elections-o chejawaha.” ine ua agandapaha.
Meghalaya Congress-ni dilgipa PN Syiem-ni agandapani gitade a·dokni manderang TMC-ko ra·chakjawa.
“TMC dolko ma·sina aro ra·chakna gita Meghalaya a·dokni manderangna bilsi 10-oni 15-onade nanggen. Nongthymmai aro Mawsynram-o donggiparang TMC-na vote puongen ine na·a chanchiama?” ine Syiem aganaha.
Meghalaya a·doko re·baenggipa 2023 bilsini elections-o Congress doloni sak 12 MLA-rang ong·kate katgenchimoba Congress dol bilona re·bapilgen ine ka·dongbee aganaha.
“Gitalgipa chanchianiko aro dolko taridapna gita chingna chu·onga gita somoi dongenga,” ine PN Syiem agandapaha.
Mukul Sangma aro sak 11 MLA-rangko ‘Political-o an·tangna ja·ga saa’ ine PN Syiem matnangata
Date:
Share post:
