SHILLONG: Re·baenggipa January 21 tariko Meghalaya a·dokni bilsi 50 gapaniko manina gita chanchirimanio, Congress dolni dilgiparangkode a·dok sorkari okamjaha ine suk ong·gijaniko parakataha.
“A·dokni bilsi 50 gapaniko manina gita chanchirimanio chingko changsasan okame chingni ku·pattianirangko on·china aganaha indiba uni ja·mande chingko okamtaia dongjaha,” ine Budbar salo, Congress Legislature Party (CLP)-ni dilgipa Ampareen Lyngdoh parakataha.
Bilsi gitalni ja·man, political dolrangko aro dingtang dingtang dolrangko chanchirimna okamanide orto dongjawaha maina a·dokni bilsi 50 gapaniko manina adita salrangsan dongaignok ineba Lyngdoh parakataha.
“A·dokni bilsi 50 gapaniko manina a·dok sorkarini tarisamsoanirang chu·ongjaha maina a·dokni bilsi 50 gapaniko manianio mai program-rangko ong·atenga chingnade ma·siata dongjaha,” ine ua aganaha.
A·dokni bilsi 50 gapaniko manchikatani bak gita sorkari, ming 50 project-rangko a·bachengatna miksongenga ine songbadrangonikosa ma·sina man·aha ineba Congress dolni dilgipa parakataha.
Ia ming 50 project-rangara maichim aro ia project-rangchi mai namgnirang a·dok man·na sienga a·dokni manderang aro opposition dolrang ma·sitokkujaenga ineba ua aganaha.
“Ia manianio sorkari chingko galonjawa ine chinga ka·dongenga,” ine Lyngdoh aganaha.