SHILLONG: East Jaintia Hills District-ni Regional Committee, uamangni tarigimin report-ko Chief Minister, Conrad Sangma Sombaro pakwatangaha.
Assam-Meghalaya sima arini biaprangona baditaba changrangna re·ange niani ja·mano uamangni tarigimin report-ko Committee, mijalo CM-na pakwatangaha.
Ru·uta bilsirangna sima tik ka·grikna man·gija donchipenggipa Assam-Meghalaya sima ariko tik ka·grikna gita biap-bichamrangko nigrikchina, golmal gnanggipa dam 12 biaprangoni, nanggrikani komikalgipa dam dok biaprangko skang tik ka·chengna ine a·dok damgnian doltangtang gita dolgittam regional committee-rangko songaha. Ia damdok biaprangara West Khasi Hills-ni ning·ogipa Tarabari, Gizang aro Hahim, West Jaintia Hills-ni Ratacherra aro Ri-bhoi district-ni ning·o Boklapara aro Khanapara-Pilangkata iarangan ong·enga.
A·dok damgnini ge·song gimin committee-rangan sing·grik sangrike kamrangko ka·angaha.
Ge·songgimin committee-rang, songni nokni geographical location-rangko aroba uano songdong-a·chagipa manderangko nigrike kamrangko ka·angaha.
