M’laya a·dokni bilsi 50 gapaniko dal·e manijawaha: CM

SHILLONG: Meghalaya a·doko COVID-19 man·giparang batrorobataiengahani gimin a·bachengo sorkarini manchisogimin gita a·dokni bilsi 50 gapaniko dal·e manigija chone maniangskana tik ka·angaha ine Sombar salo, a·dokni Chief Minister Conrad Sangma parakataha.
Chief Minister-ni parakatani gitade, Sombar salo iani bidingo sorkari tom·e chanchirimangenba, a·dokni bilsi 50 gapaniko dal·e manigija chone maniskana manchie donangaha.
“Meghalaya a·dokni bilsi 50 gapaniko sorkari dal·e manina program-rangko tarisoahaoba, ia sal somoirango Omicron man·giparang batrorobaengahani gimin chinga iako dal·e manigija chonkale ong·atskana tik ka·aha,” ine Sangma parakataha.
Re·baenggipa January-ni 21 tariko a·dokni bilsi 50 gapaniko manina manchisoenggipa program-ni bidingo talataniko on·angengon, ia salko Shillong songjinmani JN Complex-o manianggen aro gipin a·jarangba online gita ia program-o bakko ra·angskagen ine Chief Minister parakataha.
Ia Meghalaya Day-ko Shillong songjinmani JN Complex-o manianio 30 percent-na bate manderang bakko ra·na man·jawaha ine talataniko on·angengon, sorkarini a·bachengo tik ka·sogimin gita ia salo ming 50 gital project-rangkoba a·bachengatjawaha indiba ia bilsio a·bachengate on·angna gita ming 300 gital project-rangko sorkari segate donskaaha ine Chief Minister parakataha.
Ia salko manianio mongsongbatgipa project-rangoni mingsa minggni project-rangko sorkari jinmana parakatskagen ineba Chief Minister parakataha.
A·songni Prime Minister Narendra Modi-ko ia maniaona okamatgipani gimin sing·on, da·o dipet PM-ni re·baani bidingo PMO-oni maming u·iatanirangko man·soa dongkuja indiba u·iatanio pangchake sorkari ja·kurangko de·anggen ine Chief Minister parakataha.
Re·baenggipa January 21 tariko Meghalaya a·dokni bilsi 50 gapaniko manina gita a·dokni pilak biaprangon dingtang dingtang program-rangko ong·atna gita tarisamsotokengahachim ine nikna man·a.