HNLC-ni gitcham dilgipako so·otani bidingo inquiry report-ko ta·raken parakchina Cong dabia

 

SHILLONG: Re·anggipa bilsio Hynniewtrep National Liberation Council (HNLC) bobil dolni gitcham dilgipa Cheristerfield Thangkhiew-ko police-rangni so·ote galani bidingo inquiry dakani report-ko ta·raken parakchina gita Congress dabiangtaiaha.

HNLC bobil dolni gitcham general secretary Cheristerfield Thangkhiew-ko police-rangni so·otgalani ja·man dingtang dingtang dolrang, sorkarini kamko jegale jingjengatanirangko dakani ja·man a·dok sorkari, ia a·selni bidingo am·sandina gita dingtangmancha inquiry commission-ko songe on·ahachim.

Ia a·sel ong·ani re·anggipa bilsini August 13 tarikon ong·ahaoba da·onan ia a·selni bidingo inquiry dakani report-ko man·skakujaengani gimin Congress dol, suk ong·gijaniko parakataha aro ia inquiry report-ko ta·raken jinmana parakchina gita sorkario dabiangaha.

Iani bidingo kobor ra·timgipa manderang baksa agangrikengon, inquiry report-ko sorkari, jagittamni gisepon jinmana parakgen ine ku·rachakahaoba da·onan report-ko jinmana parakkujaenga aro batesa inquiry commission somoiko ra·daproroenga ine Congress dolni dilgipa PT Sawkmie parakataha.

Ia a·selko manderang gualchipchina aro case-ko bon·chipatna gitasa sorkari chalakki dakenga ineba ua matnangataha.

“Ia obostako anga bon·chipatna on·jawa aro Assembly-ni session-ko ong·attaiahaon iani bidingo anga sorkariko sing·dotaigen. Manderang ia obostako gualchipchina gitasa aro ia case-ko bon·chipatna gitasa sorkari somoiko ra·e dongenga,” ine Congress MLA aganaha.

Get real time updates directly on your device, subscribe now.

Comments are closed.