A·doko niam gri koela badinganiko kacharini nirokanichi sandirokchina Mukul dabia

SHILLONG: Meghalaya a·doko niam gri koela bikotani aro koela salruraaniko kacharini nirokanichi sandirokatchina gita a·dokni gitcham chief minister aro All India Trinamool Congress (AITC)-ni dilgipa Mukul Sangma dabiangaha.
South Garo Hills a·jao niam gri koelarangko bikote salruraenga ine dingtang dingtang dolrangni aro MDC-rangni koborko on·atani ja·man Mukul Sangma an·tangan, South Garo Hills a·jani koela a·damrangona re·ange nieaha ine kobor on·aha.
Ia jolrango niam gri koelarangko badingenga ine badi ka·anirangko man·engani gimin Sombar salo, ua MDC-rang aro dingtang dingtang dolrang baksa, South Garo Hills a·jani Jadigittim samba jolo donggipa Era A·ning-ni koela a·damko nieaha.
Mining & Geology official saksani parakani gitade, ia biapo chimonge donenggipa koelarangara bikotdaldalgipa koelarangan ong·achim. Ia koelani sample-rangko Mukul Sangma-na on·atani ja·man, ia koelarangara Gasuapara aro Assam-ni koelarang baksa apsan ong·ama ong·ja uko porikka ra·e nigen ine parakataha.
“Batanggimin bilsignina kingking anga iandake niam gri koela bikotaniko name am·sandichina sorkariko aganengahachim. MMDR Act-ni section 21 aro sub-section 1-ni ning·o iarangara rim·e sandirokna nangani kamsa ong·a aro iako dakna gita darangba aganna nangani dongjachim. Iani bidingo kacharini nirokanichi SIT-ni gita sandirokaniko dakna nangchongmotenga,” ine ia biaprangko nieani ja·man Sangma parakataha.
A·doko niam gri koelarangko badingengani a·selan a·dok tangka paisani gita neng·nikanirangko man·na nangenga ineba Sangma aganaha.
“Tangka paisarangan gipinrangni pocket-onasa re·angenga ong·ode maikai a·dokona tangka paisarang sokbagen? Na·simangan a·dokko nisienggiparang ong·a. Niam gita koelarangko bikotgenchimosa a·dokna kajinarang sokbagen,” ine ua aganaha.
Garo Hills-o salantian ritchani ritcha koela salgipa garirang re·ruraengoba uni re·angani somoio bang·gija truck garirangkosan ua nikbaahani giminba namen aiao inmananiko parakaha.
“Salgnina skangsan anga angni ia biapona re·bana siengani gimin chief secretary-na u·iataha aro iani bidingo anga darangnaba u·iatsokujachim. Angna badi ka·e sedoatanirangko man·soahani giminsa anga ia biaprangko nina re·baaha aro apsankon a·dokni CM aro chief secretary-naba uamang seatahachim. Indide maini gimin uamang maming ja·kurangko de·jaenga?” ine Sangma sing·doangaha.
A·doko niam gri bikotenggipa koelarangko banona ra·angenga ineba ua sing·doangaha.
“Ia biapo man·gipa koelarangko porikka ra·e niahaon Gasuapara-o galenggipa koelarangara ia biaponinma ma Assam-oniko ra·baengasama, an·ching ma·sina man·gen,” ine AITC-ni dilgipa parakataha.