TURA: Meghalaya a·doko Congress dol bilakbapiltaie sorkariko rikgen ine Meghalaya Pradesh Congress Committee (MPCC)-ni president, Vincent H Pala, an·tangni ka·dongchakenganiko parakataha.
Sombar salo ua, North Garo Hills a·jaona re·bae, Kharkutta, Mendipathar aro Resubelpara constituency-ni ning·o donggipa dingtang dingtang Block Congress Committee (BCC)-rang baksa tom·e chanchirimangani ja·man iako parakataha.
“Chinga Khasi-Jaintia Hills jolrango namen bilaka aro ianona re·bae Congress dolna kam ka·giparang aro dilgiparangni rimchaksoaniko nike, 2023 bilsioba chinga chepiltaigen ine ka·dongna man·engaha,” ine Pala aganaha.
Re·anggipa bilsio a·dokni gitcham chief minister Mukul Sangma-ko man·chape gimik sak 12 Congress MLA-rangni Trinamool Congress (TMC)-o napgopangani ja·man Meghalaya a·doko Congress dol bilgriatako man·na nangahani gimin Congress dolni membor-rangna ka·dongataniko on·na gita MPCC-ni president, salgittamna Garo Hills-ni dingtang dingtang biaprangona wenbaahachim.
“Mukul Sangma-ni wate katani ja·man Garo Hills-o Congress dol bilgriatako man·aha ine na·simang pilakan ma·sia. Dilgiparang wate katgenchimoba doltangna kakket ong·e kam ka·enggiparangni dongkuengako nike aro gital membor-rangkoba nike anga name katchaa. Anga namen ka·dongenga, mikkangchi ong·na sienggipa election-rango chinga bang·bata seat-rangkon chegen,” ine Pala aganaha.
Pala-ni North Garo Hills a·jaona re·angani somoio a·dokni gitcham MLA-rang, chong·motan Deborah Marak, Omillo Sangma, Billykid Sangma aro Brigady Marak-ba unbaksa dongpae bak ra·angaha. Unbaksana Congress dolni state secretary Grithalson Arengh aro chadambe dolko dilenggipa Wilness Marak aro Roger Benny Sangma-ba dongpae bak ra·angaha.
2023 bilsini Assembly election-o Congress dol, gipin dolrang baksa bakrime susajawa indiba an·tangarian susaangaigen ineba MPCC-ni president parakataha.
