NPP-ni do·ga gimiknan kulia, pilakkon rimchaksoa: Tynsong

SHILLONG: NPP dilgipa aro Deputy Chief Minister Prestone Tynsong, ‘NPP-ni do·ga gimiknan kulia, jeba party-ona re·bana sikgiparang dongode re·bana man·aigen, party kusi ong·en rimchaksogen’ ine aganataha.
Congress-ni MDC Fantin J Lakadong-ni party-oni ong·kate bilo donge kam ka·enggipa NPP-o napna tik ka·ani koborko man·a ja·man, ia kattarang nakataha. Kobor man·ani gitade, uni jikgipa aro Congress dilgipa Ampareen Lyngdoh-ba apsankon ja·riknaba donga.
Uandake Lyngdoh, mikkangchi NPP-o napgenma napjawa iako da·ode tal·e u·iaha ine janapatenba, ‘chinga pilakkon kusi ong·e rimchaksoa, chingni party-ni do·ga gimiknan kulia” ine aganataha.
“Jeba chingni party-ona re·bana sikode, chingni nokdring dal·bea aro NPP-o pilakkon rimchaksoa.”
A·doko legislator-rang ge·sa party-oni ong·kate ge·gipin party-ona napangani bewalara gital ong·ja, uni gisepon mikkang bilsi 2023-o Assembly election-ba donga, expert-rangni aganani gitade election-na skang bang·a dilgiparangko party ge·saoni ge·gipinona jitako nikna man·aba gnang.
Indake ong·engon NPP-ni adita sak MLA-rang party-o kusi ong·ja ingipani bidingo sing·anina Tynsong indine aganchakaha, “iandakgipa kattako party-o knaa dongja, ian indin katta jangbingbanganisan ong·aia, party-o gimikan apsan ong·toka aro mikkangchi apsan dake meligrike kam ka·angkugen.”
Kobor man·ani gitade, NPP-ni adita sak MLA-rang, party baksa kusi ong·jaenga uni gimin gipin party-ona jitskanaba donga.