GHADC-ni gital CEM-ko ra·galchina dabie mikkang antiba office picketing-ko ka·angkugen

TURA: Garo Hills Autonomous District Council (GHADC)-ni gital chief executive membor (CEM) Rakesh Sangma-ko ra·galpilchina dabie GHADC office-ko kam ka·na on·gija NGO-rangni jingjengatani mijal Sukrobar salo tom·tome matchotangahaoba, NGO-rangni dabianiko knachakjaengani gimin mikkang antioba apsan daken Sombar saloni Sukrobar salona GHADC office-ko kam ka·na on·gija jingjengatangkuna jinma tik ka·e donangaha.
Ia jingjengataniko GSU, FKJGP, ADE, AYWO aro FAF dolrang dakdilengachim aro gital CEM-ko jegale jingjengatanio AHAM aro Garo Hills-ni gipin NGO-rangba bakrimpaengachim.
GHADC-ni gital CEM-ko ra·galpilchina dabie, iana skangba February 3 tarikonin salgnina non-cooperation movement (NCM) aro antigimikna night road blockade-ko ong·atangahachim.
Ia antini Sombar saloba Garo Hills gimikni NGO-rang, kotok jinma baksa GHADC office-ona napdraangenba, Rakesh Sangma-ko CEM ong·aoniko ra·galchina jinma inchroe dabitokahachim indiba da·onan uko CEM-ni biaponiko ra·galpilkujaengani gimin Mongolbar salonin NGO-rang, Garo Hills gimikni manderang baksa nangrime, GHADC-ko kam ka·na on·gija jingjengatengachim.
Gital CEM Rakesh Sangma-ra atchiaonin A·chikrangni bewalo janggi tangbagipa mande ong·jagenchimode maikai A·chik jat aro a·songko dilna man·gen ine Garo Hills gimikni manderangan uni CEM ong·aniko raken jegaltokengachim.
Sukrobar salo antigimikna GHADC office-ko kam ka·na on·gija jingjengataniko matchotatani somoio dingtang dingtang NGO-ni dilgiparang, kobor ra·timgiparangna aganprakatengon, gital CEM-ko ra·galani bidingo da·onan NPP sorkarioni aro CEM an·tangba maming aganchakanirang dongkujaengani gimin re·baenggipa Sombar saloni a·bachenge Sukrobar salonan GHADC-ko office picketing ka·angkugen aro iani ja·manoba maming aganchakanirang dongjagenchimode jinma apsan chanchirimenba rakbate jingjengatanirangko dakangnaba gnang ine mikrakataniko on·angaha.