TURA: Re·anggipa Sombar salo, South Garo Hills a·jani Aginma Wario gimagipa mandeni manggisiko police-rang, Mongolbar pringo man·aha.
South Garo Hills a·jao donggipa Eringgre songni bilsi 18 ong·gipa John Clitszer Marak, Sombar attamchibara 3:00 bajimango Aginma Fish Sanctuary-ona jroe rona re·angahachim indiba rasong grie ua chioni nadobapiljahachim.
Uni gimaani salon, police-rang kobor man·soenba, songni manderang baksa uko sandibeahachim indiba ja·mano walahani gimin nikjae, Mongolbar pringona sandianiko dontongatskaahachim.
Mongolbar pringwalonin police-rang, ia mandeko chioniko sandina a·bachengtaiaha aro uandaken ja·mano uni sigimin manggisiko chioniko ra·ongkatna man·aha.
Indake ong·engon, East Garo Hills a·jani Rongkem jolo donggipa Simsang chibimao gimagipa mandekode ia koborko seatengmiting somoionan man·kujaenga ine kobor on·aha.
Sombar salo Gondenggre songni bilsi 16 ong·gipa Niksrap Sangma, Rongkem jolona re·ange, Simsang chisamo picnic cha·engmiting somoio chio gimaahachim aro uko Sombar salonin police-rang, songni manderang baksa sandibeahaoba man·pilkujaengachim.
Sombar salo, Garo Hills gimikon Jisu Kristoni chakatpilaniko maniani bak gita dingtang dingtang biaprango jinma cha·rim ringrimanirangko dakangahachim aro ia salo bang·en a·sel ong·anirangko nikna man·ahachim. Bang·bata biaprangon chadamberang, skatang ringe cha·e ia salko maniani a·sel, ong·nanggija a·selrangko chagrongna nangtokahachim.