SHILLONG: Meghalaya a·doko load shedding ba bijoliko kimitengani a·sel manderang neng·nikanirangko chagrongna nangtokengon, mikkarang chu·onga gita wagenchimosa bijoli kimitaniko dontongatna man·gen ine a·dokni Power Minister Prestone Tynsong parakataha.
Meghalaya a·dok gimikon ia sal somoirango load shedding-ko ra·gattaina nangengahani gimin an·tangni suk ong·gijaniko parakatengon, Umiam wari da·o namen chonahani a·sel bijoliko chu·onga gita man·jaengani gimin a·dok gimikon bijoliko kimitna nangao ga·akenga ine Power Minister parakataha.
“Unbaksana an·ching bijolina Leskha dam-oba pangchakna nangengani gimin bijoliko chu·onge man·jaenga aro uandaken chinga bijoliko brena nangao ga·akenga,” ine Tynsong aganaha.
Power Minister-ni talatani gitade, a·dok sorkari bijoliko breengon, unit-prako gong 11 ba gong 12 ka·e brena nangenga aro bijoliko MeECL, manderangna palskaengon, unit-prako gong 6/- ka·esan palskana nange bijoliko breanio sorkari noksan ong·na gita nangenga.
“Uni gimin a·doko songdongenggipa manderang, MeECL-ni noksan ong·anikoba ma·sichakna nangenga. Bijoli chu·ongteljani giminsa chinga bijoliko kimitna nangenga,” ine Tynsong parakataha.
Sorkari baksa bakrimchina bijoli jakkalenggipa manderangko didiatengon, batanggimin bilsirango gita mikkarang chu·onge wagenchimode load shedding dongjawaha ine Power Minister parakataha.
“Batanggimin bilsiode load shedding-ko konta gittam konta bri aro basakobarangde konta bongamangba ka·na nangaha. Da·o chirang tu·na a·bachengahaode chinga a·dok gimikon load shedding-ko ra·galpilgnok,” ine Tynsong, ku·rachakaniko on·ataha.