SHILLONG: Re·baenggipa 2023 bilsini Meghalaya Legislative Assembly election-na tikitrangko sualani bidingo da·o dipet chanchia dongkuja ine BJP-ni state president Ernest Mawrie parakataha.
Re·baenggipa 2023 bilsini Assembly election-o North Shillong constituency-oni susaatna gita BJP-ni dilgiparang candidate-ko seokmanaha ine matnangenba, adita salrangna skangsan BJP Shillong city-ni general secretary Rocky Hek, BJP-oni ong·katahachim.
Rocky Hek-ara, Pynthorumkhrah-ni BJP MLA AL Hek-ni grigipa ong·achim aro ua re·baenggipa bilsio mamatanggipani constituency-on mamatanggipa baksa susana parakatskaaha.
Indake ong·engon, Rocky Hek-ni iandake agananiko BJP-ni state president jegalatskaenba, BJP-ni tikitrangko on·ani giminde ma·mongo donggipa BJP-ni dilgiparangsa chanchigen ine talataniko on·angskaaha.
“BJP dolara national party-sa ong·ani gimin tikitrangko on·na skangba chinga dingtang dingtang niamrangko ja·rikna nanga. Rocky Hek-ni iandake agananiara kakket ong·ja,” ine Mawrie parakataha.
Rocky-ni BJP-oni ong·kataniara AL Hek-ni susaanio maming nangchakeanirang dongjawa ineba Mawrie aganaha.
“Ua an·tangni skani gitasa doloni ong·kataha indiba North Shillong constituency-oni susana gita una tikitko on·gen ine BJP-ni dilgiparangde changsaba una ku·rachaka dongkujachim,” ine Mawrie aganaha.
BJP-ni membor-rangna skatangde tikitko on·na man·ja indiba dingtang dingtang niamrang, jekai central parliament board committee aro uandakgipa dolni dilgiparang chanchichengani ja·mansa tikitkode on·na man·a ineba BJP-ni state president parakataha.
Rocky Hek, BJP-oni ong·katenba, re·baenggipa bilsini Assembly election-o National People’s Party (NPP)-ni tikito Pynthorumkhrah constituency-oni susagen ine parakatahachim.