SHILLONG: United Democratic Party (UDP)-na je portfolio-ko on·aha, ua gimikon cha·bokanirarasa ine state Congress matnangataha.
“UDP-na jedakgipa portfolio-ko on·omangba mamingan chu·sokjawa, maina uamangni jako ra·gipa gimik kamrangon cha·bokanisan dongaia, ine Meghalaya Pradesh Congress Committee-ni president Vincent H Pala, matnangataha.” UDP-ni portfolio-ko jako ra·onisa liquor home delivery ba nokona chuko deliver ka·ani sokbaaha, Social Welfare Department-o mirong scam sokaha. Iarangna agreba UDP-ni Home portfolio-ko jako ra·on coal scam scam ba koila cho·a ba bikotanio cha·bokanirang sokaha. UDP, maming kamko gisik nange ka·gipa ong·ja. Ua-mang a·dokni manderangni namgnina ong·ja, an·tang-tangni namgninasa kam ka·giparang ong·a, ine MPCC chief aganaha.
UDP, NPP-ni dilenggipa MDA sorkario bakrimgipa ong·a. Indake ong·engon MPCC chief, re·anggipa jao Assembly-ni dome be·-gruani giminba matnanga-ha maina ua project-koba UPD president aro Assembly-ni Speaker -an nirokengachim. Iarangni gisepon a·dok sorkari, Assembly project-ni be·gruani mamlko audit ka·na IIT Guwahati-ko okamahani giminba suk ong·gijako parakataha. “Ia mamlako High Court judge-ni nirokanio jakgittele sandiatna nanga. Ian MDA sorkari, uamangni ong·gija kamrangko donnuna jotton ka·engasa ine matnangaha.
