SHILLONG: Ma·mong sorkarini ra·gatgipa Agnipath scheme-ko a·song gimikon jegaltokengon, ia scheme-ko ta·raken ra·galchina gita a·dokni Governor Satya Pal Malik dabiangkuaha.
Ia Agnipath scheme-ara Indian Army-o napna miksonge dongenggipa chadamberangko cha·bokani gitasa ong·enga ine an·tangni agangimin kattarangni gimin janapatengon, Kargil War-o kamko ka·anina Param Vir Chakra-ko man·gipa Yogendra Singh Yadav-ba ia scheme-ko ra·gatanichi sipai dolrang bilgribatgen aro sipai dolrangni ka·donganiko bilgriatani gita ong·gen ine aganmanaha ine Meghalaya Governor parakataha.
“Yogendra Singh Yadav-na bate sawa iani scheme-ni gimin nambate aganna man·kugen,” ine Mongolbar salo, a·dokni Governor parakataha.
Ma·mong sorkarini ia scheme-ko ra·gataniara namen ong·jaha ine janapatengon, ia scheme-ko ra·galpile a·bachengo daka gitan sipai dolrango rimnapani apsan kamko ka·china Malik didiangaha.
Iani bidingo ua baditaba chang ma·mong sorkari baksa agangrikahachim indiba da·onan maming ja·ku de·anirang dongkujaenga ine janapatengon, iandakgipa ja·kuko de·china sawa ma·mong sorkariko aganaha ua ma·sikujaenga ine Malik parakataha.
Ia Agnipath scheme-ara sipai dolni kam minggittamo commission officer-ni ning·o donggipa sipairangko seokna gita ma·mong sorkarini ra·gatgipa scheme ong·achim indiba ian sipairangko a·bachengode bilsibrinasan rimnapna ra·gatgipa scheme ong·engachim.
Bilsi brina kamko ka·ani ja·man 25 percent-kode Indian Army-o kam ka·angkuna chol on·gen indiba bangki 75 percent-kode gimik gong lak 12 tangkarangko on·e bon·ataignokchim.
Ia scheme-ko ma·mong sorkarini parakatani bakan a·song gimikon ia scheme-ko jegalgrimtokskaengahachim.