WILLIAMNAGAR: Garo Hills-o bijoliko nambate on·china dabienggipani bidingo MeECL department-ni gita sal 15-ni ja·manoba maming aganchakanirangko on·na man·jahani gimin Sombar salo Williamnagar-ni dolbri NGO-rang, chong·motan GSU, FAF, FKJGP aro AIGU dolrang, poster campaign-ko ong·ate MeECL-ni kosako jegalanirangko dakangtokaha.
Ia poster campaign-ko ong·atanio dolbri NGO-rang, Garo Hills-na dontonggija bijoliko on·china, Power department-o mikkang niteani kam ka·giparangko rakkichina, Garo Hills-na MeECL-o chu·onga gita kam ka·giparangko rakkichina, Garo Hills-o kam ka·giparangko Khasi Hills-ona ra·jitangchina, MeECL-ko chalainio mikkang niteani gri ong·china, Shillong-o donggipa MeECL-ni head office-o A·chikrangkoba kamo rakkichina dabianirangko dakangan baksana 2020 aro 2021 bilsirango Khasi Hills-o bang·en kam ka·giparangko rakkiahaoba Garo Hills-ode saksakoba kamo rakkidapjaha ine jegalanirangko dakangtokaha.
Ia poster campaign-ko dakani ja·manoba MeECL ba Power department-oni ia dabianirangna maming aganchakanirang dongjagenchimode re·baenggipa July 21 aro 22 tarikrango salgnina Williamnagar-o donggipa MeECL office-rangko kam ka·na on·gija jingjengatanggen indiba office picketing ka·anio line nirokgiparangko aro bill collection centre-kode champengani dongjawa ine ia dolbri NGO-rang parakataha.
Garo Hills-o kam ka·giparang chu·ongjaengani a·sel bijoliko name on·na man·jaengani gimin iani ja·man dingtangmancha NGO-rang, Garo Hills gimikon MeECL-ni kosako campaigning drive-ko ong·atanggen ineba dolbri NGO-rang parakataha.