SHILLONG: Political party-rang mikkang bilsi 2023 Assembly election-na tarisoengon, Meghalaya Democratic Alliance-o bakrimgipa dolrang, an·tangtang dolsan ong·e susana tarisoenga aro gipin dol baksa bakrimani gimin chanchijaenga, indake ong·engon state Bharatiya Janata Party, ‘election matchotahaon gimik party-rangan BJP baksa bakrimna re·batokgen’ ine ka·dongsoenga.
BJP legislator AL Hek, election matchotahaon, BJP, sorkariko rikanio dongpaigen ine ka·donganiko parakaha.
“Sorkariko rikanio party-san gamchata ine ong·ja, niatgenchimode numborsa gamchata, uni gimin BJP gride sorkariko rikna amjawa, ine BJP-ni dilgipa Hek aganaha.
“Chinga sorkariko rikanio mongsonggipa dol ong·a, maina BJP-an changsatai a·songko sason ka·taigen. An·ching gimikni gita development-on ma·mong sorkarini dakchakaniko nangaigen, uni gimin Meghalaya-o gital rikgipa sorkarioba BJP dongaigen.”
“Jedakgipa developmental project-na Delhi-ona re·na nangtelaia, aro Delhi-o sawa donga? BJP-na agre” ine agandapaha.
Uandake state BJP-o meligrikgijani bidingo sing·on, “Chinga apsan ong·a, dingtang dingtang kattarangko agananiara meligrikgijani donga ine ong·ja. An·tangtangni chanchiako agana aro meligrikgijanio namen dingtanggrika, ine Hek aganangaha.
