SHILLONG: Mission Organic-ko NPP-chi dilenggipa MDA sorkari nosto ka·e galenga ine Opposition Trinamool Congress (TMC)-ni dilgipa Mukul Sangma-ni matnangatani ja·man, ia Mission Organic-ko gitcham MUA-2 sorkarian chu·sokgipa ong·atchengjaha ine Congress doloniko ra·gala man·gipa MLA PT Sawkmie, MDA sorkarina chake parakatskaaha.
“Survey-rangko name dakchenggija aro game ge·e cha·enggipa manderang baksa agangrikchenggijasa Mission Organic-ko ra·gatna gita gitcham sorkari ja·ku de·chakatahachim,” ine Sawkmie aganaha.
Ia Mission Organic-ko jako ra·e kam ka·angkuahani gimin da·o ong·enggipa sorkariko mittelchina a·dokni gitcham chief minister aro Opposition dolni dilgipa Mukul Sangma-ko didiatengon, ia Mission Organic chu·sokgipa ong·jahani gimin nambata mission-ko ra·gatani bidingo sorkari chanchiskana nangengaha ine Sawkmie parakataha.
2014 bilsi dipetan a·doko game ge·e cha·enggiparang bang·en noksan ong·atako man·na nangaha ine janapatengon, mikkangchi game ge·e cha·enggipa manderang neng·nikanirangko chagrongna nangjana gita maiba niamrangko ra·gatengon sorkari namen simsakbena gita nanga ine Sawkmie aganaha.
Meghalaya a·doko gama ge·anirangko dakengon, samrangko jakkaljachina gita 2014 bilsion, Mukul Sangma-ni chief minister ong·engmiting somoio ge·etaniko on·angahachim.
A·doko ong·telaigipa gama ge·anirangko dakna gita sam jakkalaniko champengatahaoba, da·o ong·enggipa sorkari, ia champengataniko adita salrangna skangsan ra·galatskaahachim.