TURA: Sombar salo, West Garo Hills a·jani Anti Narcotics Task Force (ANTF) official-rang, niam gri drugs ba sam badingenggipa mande sakgittam baksana adita samrangko rim·na man·aha.
Police official-rangni u·iatani gitade, drugs badingenggipa manderangni gimin koborko man·soenba, ANTF-ni official-rang, Robibar salonin nirikkianirangko dakna a·bachengataha aro uandaken konta 15-na am·sandianirangko dakenba, gari bolsao mande sakgittamko West Garo Hills a·jani Selsella Agipgenggre songoniko rim·na man·aha.
Rim·ako man·gipa manderangara, Matgrik Ch Marak, Jaksram Ch Marak aro Bringstar Ch Marak ong·achim aro uamang sakgittaman Tura Dobasipara jolonin ong·achim.
Ia manderangoniko police-rang, gram 10.22 ong·gipa Heroin sam, gram 92.54 ong·gipa powder, gong 57,500 tangkarang, mobile phone ge 3, ML-10 5575 Maruti 800 car aro gipin bosturangkoba rim·aha.
Iani bidingo police-rang, mokordomako segatenba, am·sandianirangko dakengkua ineba police official-rang parakataha.
