SHILLONG: Meghalaya a·doko niam gri koela bikotani aro koela salruraaniko champengna gita a·dok sorkari raken kamko ka·enga ine Bristibar salo, a·dokni Chief Minister Conrad K Sangma, Assembly-na ku·rachakaniko on·angaha.
Autumn Session-o Mawlai-ni Congress MLA PT Sawkmie-ni sing·anina aganchakaniko on·angengon, niam gri koela badingenggipa manderangni kosako rakgipa ja·kurangko de·an baksana niam gri koela bikotaniko champengna gita district administration-rangba rake kamko ka·enga ine Chief Minister parakataha.
“Niam gri koela bikotgipa aro koela salruragipa manderangko rim·a man·engode IPC aro MMDR Act 1957-ni dongimin niamrango pangchake rakgipa ja·kurangko de·enga,” ine Chief Minister aganaha.
Budbar salo, Home Minister-ni parakatgimin gita 2022 bilsini August 31 tarikona kingking, niam gri koela salruraanina ming 1652 case-rangko segataha aro ianoni ming 1354 case-rangnade charge sheet ka·e sak 472 manderangkode pattokrango donataha ine Chief Minister parakataha.
Apsan daken, niam gri koela bikotanina ming 199 case-rangko segataha aro ianoni ming 108-kode charge sheet ka·e sak 23 manderangna kachari raiko on·aha ineba Chief Minister parakataha.
Iana skang, a·doko niam gri koela badingani bidingo chanchirimaniko Mawlai-ni MLA PT Sawkmie, Assembly-ona ra·baengon, a·doko koela bikotaniko bon·atna gita 2018 bilsion Assembly-o uamang ku·mikchetaniko ra·ahachim indiba da·alonan niam gri koela badinganiko bon·atna man·kujaenga ine an·tangni suk ong·gijaniko parakataha.
A·doko niam gri koelarangko bikotengani a·sel bang·a manderang siangna nangahani giminba Sawkmie, an·tangni suk ong·gijaniko parakataha.